ایبک (پژواک،۷وری ۱۴۰۱): د سمنګان د کرنې ریاست د نباتاتو د ساتنې مدیرګلاب الدین غیاثي خبرداری ورکوي، که د مضرو ملخانو پر وړاندې اقدام ونه شي د یاد ولایت زراعت به له منځه لاړشي.
ده پژواک خبري اژانس ته وویل، د دې ادارې د پلان له مخې باید د وري له لومړۍ نېټې څخه د ملخانو پر وړاندې مبارزه پیل شوې وای، خو د بودجې نشتون له امله دغه پلان لا عملي شوی نه دی.
هغه زیاته کړه:" که د ملخانو پر وړاندې د تېرو کلونو په څېرمجادله ونه شي، نو روان کال به سل په سلو کې له امله یې زرګونه هکټاره کرنه له منځه لاړه شي او بزګرانو ته به سخت اقتصادي زیانونه واوړي."
غیاثي وویل، د دغه ولایت د کرنې ریاست هر کال په هغو سیمو کې دا کمپاین ترسره کاوه چېرته چې ملخ پیدا کېدل.
نوموړي وویل چې دغه کمپاین به یې په شپږو کاري ډلو کې د ۸۰ کاریګرو، ۸۰ دوا پاشۍ ماشینونو او شپږو موټرو په واسطه پیلول؛ خو سږکال لا نه دی پیل شوی.
هغه وویل، د یادې ادارې د سروې له مخې، د تېرکال غبرګولي میاشت کې دغو ملخانو په ډېرو سیمو کې تخمونه اچولي دي.
د مرکز اړونده «رباتک، تایخونک، منقوطن، شیرکیار» سیمې، د حضرت سلطان ولسوالۍ «ګاودره، اوملي، اوچ قدوق، قلین قدوق، والشه» سیمې او د دره صوف پاین ولسوالۍ «سفید کوتل» هغه سیمې دي چې دغو ملخانو په کې تخمونه اچولي دي.
هغه وویل، اوسمهال په سمنګان کې د کرنې ادارې په ډيپو کې د ملخانو له منځه وړلو په موخه ۳۵۰۰ لیتره دوا شته.
نوموړي وویل، یاده موضوع مو له کرنې وزارت سره د تیلیفوني اړیکې او مکتوب له لارې شریکه کړې؛ خو تر اوسه د سمنګان کرنې ریاست ته پیسې نه دي رالېږل شوي.
له بلې خوا بزګرهم د ملخانو له خطره په ویره کې دي او له حکومته غواړي چې د مخنیوي لپاره یې لاس په کار شي.
د تایخونک سیمې د سرشور کلي اوسېدونکي محمد عوض وویل:" یوه اوونۍ کیږي چې ملخان له ځالو راوتلي او واښه خوري، که یې مخه ونه نیول شي ټوله کښتونه به له منځه یوسي."
د حضرت سلطان ولسوالۍ د منقوطن کلي او سېدونکي رحمت الله وویل:" دغو ملخانو زموږ په سیمو کې سلګونه هکټاره ځمکو واښه له منځه یوړل" دغه سیمه یې له وښو خالي کړې او مالداران یې له ستونزو سره مخ کړي دي."
هغه زیاته کړه که د ملخانو مخه ونه نیول شي، یوه یا دوه اوونیو کې به ټول کښتونه له منځه یوسي.
