کابل (پژواک، ۱۶ وری ۱۴۰۱): د افغان ښځو او بشري حقونو لپاره د امریکا ځانګړې استازې رینا امیري وايي، د افغانستان سرپرست حکومت دې د نړیوالو شرطونو له پام کې نیولو پرته د بندیزونو لرې کېدو او پر رسمیت پېژندلو تمه نه کوي.
هغې د ترکیې له ار ټي خبري شبکې سره په مرکه کې دا ډېره مایوسوونکې او خورا حیرانوونکې بللې ده چې سرپرست حکومت له خپلو ژمنو سره سره بیا هم د نجونو ښوونځيو بندولو پرېکړه وکړه.
رینا ویلي، اوس په افغانستان او نړۍ کې د افغانستان د نوي حکومت لپاره د ازمایښت یو اړین پړاو دی.
هغې ادعا کړې چې د نجونو ښوونځيو د بیا پرانیستو مسئله د افغانستان د سرپرست حکومت د مشرانو ترمنځ هم د اختلافاتو رامنځته کېدو لامل شوې ده.
رینا امیري ویلي: "سرپرست حکومت کې داسې کسان شته چې افغانستان ته په هغه سترګه نه ګوري لکه څرنګه چې دی؛ د دوی په ذهنونو کې د افغانستان غير واقعي تصویر دی، داسې افغانستان چې د اسلام د افسانوي مفکورې پر بنسټ ولاړ وي."
نوموړې دغه راز ویلي: "هغه اسلام چې له اسلامي نړۍ سره په ټکر کې دی او د اکثرو مسلمانو هېوادونو له کړنو سره هیڅ ډول همغږي نه لري؛ زما په اند د دې ډلې ترمنځ تاوتریخوالی موجود دی، که دوی په همدې ډول خپلې سخت دریځۍ ته دوام ورکړي، غورځنګ یې وېشل کېدای شي او افغانستان له ماتې سره مخامخوي"
د افغانستان د ښځو او بشري حقونو لپاره د امریکا ځانګړې استازې همدا راز سرپرست حکومت ته خبرداری ورکړی چې د نړیوالو شرایطو په پام کې نه نیولو سره دې د بندیزونو لرې کېدو او پر رسمیت پېژندلو تمه نه کوي.
د افغانستان نوی حکومت چې شاوخوا اووه مياشتې مخکې واکمن شو، تر اوسه کوم هېواد پر رسمیت نه دی پېژندلی، خو د روسيې او چين په ګډون يې يو شمېر هېوادونو ډيپلوماتان منلي او تعامل ورسره لري.
رينا وايي، په نړیوال شرایطو کې ښوونځیو ته د نجونو تلل او ښځو ته د کار کولو حق هم شامل دي.
د روان لمریز کال د وري پر درېیمه د ښوونځیو له پیله دوه ساعته وړاندې اعلان وشو چې د نجونو د لېسو او منځنيو ښوونځيو پرانيستل تر بل امر پورې وځنډېدل.
د پوهنې وزارت ويلي چې په دې اړه پر يوه طرحه کار روان دی او له بشپړېدو وروسته به يې ښوونځې پرانيستل شي.
د امریکا متحدو ایالتونو، ملګرو ملتونو، اروپايي ټولنې، د بښنې نړیوال سازمان، د بشري حقونو د څار سازمان او نورو سازمانونو له سرپرست حکومته غوښتي چې د نجونو ښوونځي پرانیزي.
  . . .










