<p style="text-align: justify;">کابل (پژواک، ۲۹ وری ۱۴۰۱): د افغانستان هوا پېژندنې ادارې د سالنګونو په ګډون د هېواد په ۲۳ ولایتونو کې د دوو ورځو نسبتا سختو اورښتونو خبرداری ورکړی دی.</p>
<p style="text-align: justify;">دې ادارې په یوه بیانیه کې لیکلي، د سالنګونو په ګډون د هېواد په ۲۳ ولایتونو کې د دوشنبې او سه شنبې ورځو کې (د وري په ۲۹مه او ۳۰مه) له تندر او برېښنا سره مله د نسبتا سختو اورښتونو او ناڅاپي سېلابونو وړاندوینه شوې ده.</p>
<p style="text-align: justify;">په یادو ۲۳ ولایتونو کې هرات، غور، دایکنډي، بادغیس، فاریاب، سرپل، میدان وردګ، پروان، کاپیسا، پنجشیر، نورستان، کونړ، کندوز، کابل، لوګر، لغمان، ننګرهار، مزارشریف، بدخشان، تخار، سمنګان، بغلان او بامیان شامل دي.</p>
<p style="text-align: justify;">دغه راز یادې ادارې د هېواد په بېلا بېلو برخو کې د اورښت کچه د ۱۰ او ۴۰ ملي مترو ترمنځ اټکل کړې ده.</p>
