کابل (پژواک، ۲۹ وری ۱۴۰۱): د اسلامي همکاریو سازمان د خوړو خوندیتوب برخې رییس د ریاست الوزراء له سیاسي مرستیال سره په لیدنه کې ویلي چې په افغانستان کې د نابشپړو پروژو بېرته پیلېدو لپاره د مرستو راټولولو برخه کې همکاري کوي.
د ریاست الوزراء سیاسي مرستیال مولوي عبدالکبیر پرون ناوخته په کابل کې د اسلامي همکاریو سازمان د خوړو خوندیتوب رییس «یرلان باډویلټ» او د قزاقستان له سفیر عالم خان یسین ګیلدیف سره ولیدلي.
دغه لیدنه چې په سپېدار ماڼۍ کې وشوه، یرلان باډویلټ ویلي چې افغانستان د اسلامي همکاریو سازمان د غذایي مصوونیت غړیتوب لري.
نوموړي زیاته کړې، په دې حساسو شرایطو کې د یاد سازمان ټول غړي هېوادونه د افغانستان د خلکو ترڅنګ ولاړ دي او مرسته کوونکو هېوادونو «د بشري مرستو ډېرېدو ته عاجل ځواب» پروګرام تر چتر لاندې کار کوي.
هغه په افغانستان کې د خوړو ناورین ته په اشارې زیاته کړه، قزاقستان په پام کې لري چې په افغانستان کې د غنمو صادرات مخکنۍ کچې ته ورسوي او له دې لارې د خوړو خوندیتوب برخه کې همکاري وکړي.
د اسلامي همکاریو سازمان د خوړو خوندیتوب برخې رییس د اوبو تصفیه کولو شپږو ماشینونو د مرستې اعلان وکړ او زیاته یې کړه، په افغانستان کې له بزګرو سره پر مرستو سربېره د کلیو پراختیا او بیارغونې وزارت د نابشپړو پروژو د کار پیلېدو لپاره د مرستو راټولولو ته هم پلان لري.
