کندهار (پژواک، ۵ غویی ۱۴۰۱): نامعلومو کسانو د کندهار په ارغنداب ولسوالۍ کې د ادریس احمد په نوم یو ۱۶ کلن ځوان خپل کور ته نږدې په ډزو وژلی دی.
پېښه تېره شپه له روژه ماتې وروسته د دې ولسوالۍ په منارې سیمه کې شوې ده.
د وژل شوي ځوان اخښي عزیز احمد روحاني پژواک خبري اژانس ته وویل، ادریس احمد ته- چې په زلمي هم مشهور و- تېره شپه خپل یوه ملګري زنګ وهلی او له کوره وتلی خو لس دقیقې وروسته په ډزو وژل شوی دی.
هغه زیاته کړه، نوموړي له هیچا سره هیڅ راز دښمني نه لرله او نه پوهېږي چې چا او ولې وژلی دی؟
دی وايي، ادریس احمد ارام او اخلاقي ځوان و، په لسم ټولګي کې یې زده کړې کولې او له خپلو درسونو سره یې ډېره مینه لرله، خو ټولې هیلې یې نیمګړې پاتې شوې.
ده له چارواکو وغوښتل چې قاتلان پيدا او سخته سزا ورکړي.
د وژل شوي ځوان ګاونډي محمد عیسی پژواک خبري اژانس ته وویل چې د ادریس احمد وژلو د هغه همزولي سخت خپه کړي دي.
دی وايي، نوموړي د ځوانانو په ناستو او مجلسونو کې ګډون کاوه او ان له چا سره یې لفظي شخړه هم نه وه کړې.
هغه زیاته کړه: ((له بده مرغه په دې وروستیو کې په کندهار کې داسې وژنې ډېرې شوې دي خو عاملین یې نه نیول کېږي چې دې کار خلک سخت اندېښمن کړي دي.))
هڅه مو وکړه د پېښې په اړه د امنیتي ارګانونو غبرګون تر لاسه کړو خو له پر له پسې هڅو وروسته مو بیا هم ځواب تر لاسه نه کړ.
خو د کندهار اطلاعاتو او فرهنګ رییس ملا شمس الله صمیم پژواک ته وویل چې د پېښې په اړه معلومات کوي.
په دې وروستیو کې په کندهار کې مرموزې وژنې ډېرې شوې چې د خلکو اندېښنې یې پارولې دي.
شاوخوا دوې اوونۍ وړاندې د کندهار ښار په ۷مه ناحیه کې هم یو ۱۴ کلن ځوان وژل شوی او جسد یې په یوه بېرل کې اچول شوی و.
دغه راز پنځه ورځې مخکې بیا د ژیړې ولسوالۍ په سنځري سیمه کې هم د یوه ځوان جسد موندل شوی و چې لاسونه یې شا ته تړل شوي وو او د مرۍ په خفه کولو وژل شوی و.
غړيYou need to subscribe to view the full article. Please login or register a new account.
