مجاهد: پنجشېر کې د مسعود قبر ته نږدې د ځینو کسانو د اتڼ انګېزه معلوموو

کابل (پژواک، ۱۴ غویی ۱۴۰۱): د اسلامي امارت ویاند ذبیح الله مجاهد وایي، په پنجشېر کې د مسعود قبر ته نږدې د ځینو کسانو اتڼ او سندرې د حکومت تګلاره نه ده.

له تېرو څو ورځو راهیسې، په ټولنیزو شبکو کې يوه ويډيو خپرېږي چې ګواکې “طالبان” په پنجشېر ولایت کې د پخواني قوماندان احمد شاه مسعود له قبر نه په لږ لرې واټن کې اتڼ او زمزمې کوي. د  مسعود پلویانو دا کار غندلی دی.

د اسلامي امارت وياند ذبیح الله مجاهد د غویي په ۱۴مه، پر خپل ټویټر لیکلي چې د اتڼ کوونکو دا کار د حکومت تګلاره نه ده.

هغه ویلي چې د افغانستان له بېلابېلو ولایتونو څخه یو شمېر ځوانان په اختر کې د تفریح لپاره پنجشیر ته تللي وو او هغوی دا کار کړی دی.

مجاهد زیاته کړې : «هڅه روانه ده چې د دغه ناسم عمل انګېزه معلومه شي او د دا ډول اعمالو مخه به ونیول شي.»

د احمد شاه مسعود یو شمېر پلویانو په ټولنیزو رسنیو کې د دغو کسانو اتڼ غندلی او دا کار یې د احمد شاه مسعود شخصیت او مزار ته سپکاوی بللی دی.

خو ذبیح الله مجاهد ټېنګار کوي چې د دغه کار «هدف جهادي شخصیتونو ته سپکاوی نه دی». هغه لیکلي چې حکومت د جهادي مشرانو درناوی کوي او «مړیو ته سپکاوی مجاز نه دی او نه موږ دې کار ته اجازه ورکوو».