[restrict paid="true"]
کلات ښار (پژواک، ١٨ غويى ۱۴۰۱): د زابل حکومتي مسوولين وايي چې د اختر د درېيو ورځو په ګډون په تېره يوه اوونۍ کې، په دغه ولايت کې د ترافيکي پېښو له امله يو کس مړ شوى او ٣٤٩ نور ژوبل شوي دي.
د معلوماتو له مخې، دغه پېښې په مرکز کلات او دوو ولسواليو شاه جوی او شهر صفا کې شوې دي.
د زابل د عامې روغتيا رييس ډاکټر عبدالحکيم حکيمي نن (د غويي ١٨ مه) پژواک خبري اژانس ته وويل، په تېرو شپږو ورځو کې د ترافيکي پېښو له امله يو جسد او ٣٤٩ ټپيان د دغه ولايت روغتونونو ته انتقال شوي دي.
هغه وايي چې په ټپيانو کې ٤٠ تنه يې ماشومان دي.
نوموړي زياته کړه چې ډېرى دغه پېښې د چلوونکو د بې احتياطۍ له امله رامنځته شوې دي.
دى ټينګار کوي چې کورنۍ بايد خپلو کم عمره ماشومانو ته موټر او موټرسايکل په واک کې ورنه کړي.
دغه راز، د زابل یو تن اوسېدونکي نوراغا پژواک اژانس ته وويل چې میندې او پلرونه هم له خپلو ماشومانو سره احتیاط نه کوي؛ موټر او موټرسایکل په واک کې ورکوي چې له امله یې ترافیکي پېښي زیاتې شوې دي .
هغه وويل چې کورنۍ او حکومتي مسوولين بايد د يادې ستونزې د حل لپاره جدي اقدام وکړي.
بل لورته د زابل د ترافیکو مدیر ملا احمد الله نافذ وايي چې د نظامي ادارو د موټر چلوونکو په ګډون به ټولو هغو کسانو ته د ترافيکي قوانينو د زده کړې کورسونه جوړ کړي چې موټر لري.
هغه هيله وښوده چې د دغه پروګرام په عملي کېدو سره به تر ډېره د ترافيکي پېښو مخه ونيول شي.
[/restrict]
