کابل (پژواک، ۴ غبرګولی ۱۴۰۱): د سرپرست حکومت د بهرنیو چارو وزارت وايي، افغانستان د ټولو افغانانو ګډ کور دی، هیڅ وګړي ته هیڅ ډول ګواښ نشته او «اسلامي امارت» د هر هېوادوال خوندیتوب خپله دیني او ملي دنده بولي.
د دغه وزارت ویاند عبدالقهار بلخي دا څرګندونې په خپله ټویټرپاڼه کې د هغو افغانانو په ځواب کې کړې چې د پاکستان په پلازمېنه اسلام اباد کې یې د خپل ناڅرګند برخلیک په تړاو یوه میاشت پرلت او بیا احتجاج کړی و.
هغه لیکلي، هغه یو شمېر افغان وګړي چې له څه مودې راهیسې د پاکستان په پلازمېنه اسلام اباد کې د احتجاج په بڼه راټول شوي او غواړي بهرنیو هېوادونو ته ولېږدول شي، له ځینو رسنیو سره یې په خبرو کې څرګنده کړې چې ګواکې په افغانستان کې یې ژوند په خطر کې دی.
دی زیاتوي: «اسلامي امارت یو ځل بیا واضح کوي چې افغانستان د ټولو افغانانو ګډ کور دی، هیڅ وګړي ته- که هغه له هر ټبر، مذهب او یا سیمې سره تعلق لري- هيڅ ډول تهدید متوجه نه دی، اسلامي امارت د هر هېوادوال د امنیت تضمین خپله دیني او ملي دنده بولي.»
د ده په خبره، په «معترضینو» کې ډېری هغه کسان هم شامل دي چې له کلونو راهیسې په پاکستان کې ژوند کوي او اوس له فرصته په استفادې ځانونه داسې ښيي چې ګویا تازه له افغانستانه راغلي دي.
دی وايي، هغوی په دې ډول غواړي چې په نورو هېوادونو کې اقتصادي پناه ترلاسه کړي.
د راپورونو له مخې، څو ورځې مخکې د پاکستان په پلازمېنه اسلام اباد کې افغان کډوالو د مطبوعاتي کلب مخې ته تر شاوخوا یوه میاشتني پرلت وروسته احتجاج وکړ.
هغوی د پاکستان له حکومته غوښتي وو څو پر نړیوالې ټولنې فشار راوړي او مجبور یې کړي چې له دوی سره د مذاکراتو لپاره یوه باصلاحیته کمېټه وګوماري او غوښتنې یې تر نړیوالو ور ورسوي.
دغو افغان کورنیو له هغه وروسته پلازمېنې اسلام اباد ته مخه وکړه چې د تېر کال په اګسټ میاشت کې تېر جمهوري نظام وپرځېد.
د معلوماتو له مخې، تر دې مهاله په لسګونه زره افغانانو وطن پرېیښی او ډېری یې هڅه کوي په لوېدیځو هېوادونو کې پناه واخلي.
