ترینکوټ (پژواک، ۱۰ غبرګولی ۱۴۰۱): د اروزګان په مرکز ترینکوټ کې یوه عمر خوړلي ښوونکي په خپلو شخصي امکاناتو سلګونو هلکانو او نجونو ته د زدهکړې زمینه برابره کړې ده.
دغه تقاعد شوی ۶۵ کلن ښوونکی غوثالدین جلالزی نومېږي چې هره ورځ پر خپل موټرسایکل د ترینکوټ اړوند بلوڅي سیمې ته د ۲۵ کیلومتره په واټن مزل کوي او هلته ماشومانو ته درس ورکوي.
دغه ښوونکي له پژواک خبري اژانس سره په مرکه کې وویل، د مرکز ترینکوټ اړوند په بلوڅي سیمه کې شاوخوا ۳زره کورنۍ ژوند کوي، خو نه یوازې چې پر له پسې څو نسله یې له تعلیمه لرې پاتې شوي بلکې اوس یې هم ماشومان د زدهکړې لپاره ښوونځی نه لري.
هغه زیاته کړه، دوه میاشتې مخکې یې هڅې پیل کړې څو په دغه سیمه کې په خپلو امکاناتو د زدهکړې یو مرکز پرانیزي او د سیمې له اوسېدونکو سره له سلا مشورو وروسته د هلکانو او نجونو نوم لیکنه پیل کړي.
د ده په خبره، له دوو میاشتو تېرېدو وروسته اوس په دغه مرکز کې ۲۰۰ زدهکوونکي زده کړې کوي چې ۷۰ یې نجونې دي.
نوموړی وايي، د خوښۍ خبره دا ده چې د هلکانو او نجونو د زدهکړې د دغه مرکز د پرمختګ لپاره اوس کلیوالو هم لاس یو کړی او په ټوله کې هڅې پیل شوې څو له چارواکو غوښتنه وشي چې دغه مرکز په رسمي ښوونځي بدل کړي.
جلالزي وویل، اوس د زدهکړو بهیر د کلي په یوه کرایي کور کې د څلورو نورو ښوونکو په مرسته مخې ته وړي، په داسې حال کې چې د کتابونو تر څنګ، فرشونه، تختې او نور درسي لوازم یې د ښار له دوکاندارانو په پور اخیستي او اوس یې د پیسو ورکولو توان هم نه لري.
د ده په وینا، په دغه مرکز کې یې ۲۰۰ هلکان او نجونې په څلورو ټولګیو وېشلي چې د لومړي ټولګي د کتابونو تدریس ورته پیل شوی دی.
دغه ښوونکي یادونه وکړه چې په دې ښوونیز مرکز کې د زدهکوونکو لپاره د څښاک پاکې اوبه نشته او دغه راز په نورو برخو کې هم له اقتصادي ستونزو سره مخ دي.
هغه له پوهنې وزارت څخه غوښتنه کوي چې نه یوازې په دغه سیمه کې ښوونځي جوړ کړي، بلکې له دغه مرکز سره هم د درسي لوازمو مرسته وکړي او شاګردانو ته د تعلیم غوره چاپېریال برابر کړي.
د بلوڅي سیمې اوسېدونکي خوښ دي چې د ماشومانو د ښوونې او روزنې لپاره یې یو وړه خو بنسټیزه هڅه پیل شوې او تمه لري چې دوامداره او پراخه شي.
د سیمې یوه اوسېدونکي محمدالله پژواک اژانس ته وویل، که د پوهنې ریاست د دوی د سیمې لپاره ښوونځی منظور کړي، نو کلیوال به ورته یونیم جریب ځمکه وقف کړي.
دی زیاتوي، اوسمهال د سیمې د یوه ښوونکي په مرسته سلګونو هلکانو او نجونو ته د زدهکړې زمینه برابره شوې ده؛ خو زرګونه نور چې پاتې دي، هغوی ته باید اړوند مسوولین د تعلیم زمینه برابره کړي.
د یادې شوې سیمې ماشومان خوښ دي چې د زدهکړو زمینه ورته برابره شوې، خو غوښتنه کوي چې د دوی په سیمه کې دې ښوونځی جوړ شي.
سایل هغه ماشوم دی چې په دغه مرکز کې زدهکړه کوي، دی وايي، حکومت دې دوی ته ښوونځی جوړ کړي څو د نورو ماشومانو په څېر په ښه چاپېریال کې تعلیم وکړي.
د اروزګان د پوهنې رییس مولوي حقنما پژواک خبري اژانس ته وویل، د مرکز ترینکوټ په ګډون په ټولو ولسوالیو کې ډېرې داسې سیمې شته چې له کلونو راهیسې په کې ښوونځي نشته.
هغه زیاته کړه، هڅه کوي د دې ستونزې د هواري په موخه په دغو سیمو کې د لنډ مهال لپاره ښوونیز مرکزونه جوړ کړي، ځکه د ښوونځیو جوړېدل بودجې او نورو امکاناتو ته اړتیا لري.
هغه وايي، په دغه ولایت کې به نه یوازې د ښوونځیو جوړولو لپاره لازم اقدامات وشي، بلکې دیني مدرسې به هم جوړې شي.
په اروزګان کې دا مهال ۳۱۵ ښوونځي شته، له دې جملې ۳۲ هغه ښوونځي چې له کلونو راهیسې د جګړو له امله تړلي وو، تازه پرانیستل شوي دي.
GET IN TOUCH
NEWSLETTER
SUGGEST A STORY
PAJHWOK MOBILE APP