د اسلامي همکاریو سازمان غواړي افغانستان سره په بېلابېلو برخو کې مرستې وکړي

[restrict paid=”true”]

کابل (پژواک، ۳۱ غبرګولی ۱۴۰۱): د اسلامي همکاریو سازمان مرستیال وایي، دغه سازمان په افغانستان کې د ثبات پلوي دی او غواړي چې په بېلابېلو برخو کې ورسره مرستې وکړي.‌

د بهرنیو چارو وزارت ویاند عبدالقهار بلخي د غبرګولي په ۳۱مه، د شپې ناوخته په یو لړ ټویټونو کې لیکلي چې په بشري چارو کې د اسلامي همکاريو سازمان مرستيال او د افغانستان لپاره د ياد سازمان ځانګړي استازي طارق‌علي بخيت او ورسره مل پلاوي د بهرنيو چارو له سرپرست وزير مولوي اميرخان متقي سره وليدل.

سرچینې زیاته کړې، راغلي پلاوي د افغانستان په اړه د اسلامي همکاريو سازمان د بهرنيو چارو وزيرانو د فوق‌العاده غونډې د پرېکړه‌ليک د تطبيق په برخه کې شويو پرمختګونو، په دې لړ کې شويو مرستو او کابل ته د اسلامي همکاريو سازمان د علماوو د راغلي پلاوي د سفر د موخو په اړه معلومات وړاندې کړل.

طارق بخيت وويل چې د اسلامي همکاريو سازمان په افغانستان کې د ثبات پلوي دی او غواړي چې افغانستان سره په بېلابېلو برخو کې مرسته وکړي.‌

د بهرنيو چارو سرپرست وزير د اسلامي همکاريو سازمان له مثبتې ښکېلتيا او د ياد سازمان د غړو هېوادونو د مرستو له امله مننه وکړه، ويې ويل چې د افغانستان اسلامي امارت ټولو هېوادونو، په ځانګړې توګه د اسلامي همکاريو سازمان غړو هېوادونو سره د مثبتو اړيکو غوښتونکی دی.‌

[/restrict]