<p style="text-align: justify;">کابل (پژواک، ۷ چنګاښ ۱۴۰۱): ملي دفاع وزارت وایي، د هوایي ځواک د انجنیرانو په هڅو یوه بله سي ۱۳۰ (C-130) ډوله الوتکه هم ترمیم او الوتنې ته چمتو شوه.</p>
<p style="text-align: justify;">د افغانستان ملي دفاع وزارت په یوه خبرپاڼه کې د یادو څرګندونو ترڅنګ راغلي چې د دغه وزارت د هوايي ځواک په عمومي قوماندانۍ کې د نورو غېر فعالو الوتکو د ترميم او فعالولو بهير هم د افغاني انجنيرانو او تخنيککارانو له خوا روان دى.</p>
<p style="text-align: justify;">ملي دفاع وزارت د روان کال د غبرګولي په ۱۷ مه هم ویلي و چې دوې پوځې الوتکې یې فعالې او الوتنو ته چمتو کړې دي.</p>
<p style="text-align: justify;">سرچینې نه دي لیکلي چې څو الوتکې غېر فعالې دي او ترمیم ته اړتیا لري؛ خو د راپورونو له مخې، تېر کال په زمري میاشت کې امریکایي ځواکونو له افغانستانه د وتلو پر مهال یو شمېر الوتکې تخریب او غېر فعالې کړې.</p>
<p style="text-align: justify;">د <strong><a href="https://www.bbc.com/news/world-58393763">راپورونو</a></strong> له مخې، دغو ځواکونو ۷۳ الوتکې او چورلکې په افغانستان کې پرېښودې؛ خو د امریکا د مرکزي قوماندانۍ مشر جنرال کینیټ مکینزي هغه مهال ویلي و چې د دې ټولو کارول ناشوني شوي او دا الوتکې به بيا الوتنه ونه کړي.</p>
