<p style="text-align: justify;">کندهار (پژواک، ۱۴ چنګاښ ۱۴۰۱): د کندهار له مرکزي زندان څخه په بېلابېلو جرمونو تورن او په نشه يي توکو روږدي ټولټال ۳۵۰ کسان خوشي او خپلو کورونو ته ولېږل شول.</p>
<p style="text-align: justify;">د کندهار زندان مسوول مولوي اخترمحمد اغا د دغو کسانو د خوشي کولو پر مهال رسنیو ته وویل، په خوشي شوو کسانو کې د څلورو ښځو په ګډون، ۲۴ تنه په جنايي جرمونو تورن وو او پاتې یې په نشو روږد هغه کسان دي، چې درملنه یې بشپړه شوې وه.</p>
<p style="text-align: justify;">ده زیاته کړه، دغه کسان چې د ډېرو یې د بند موده پوره شوې وه او د ځینو لږ پاتې وه، د «اسلامي امارت» د مشر د ځانګړې مهربانۍ او محکمې د پرېکړې پر بنسټ، خوشي شوي دي.</p>
<p style="text-align: justify;">هغه وویل: «په دغو بندیانو کې ۲۴ تنه جنايي مجرمین وو چې غلا او د شریعت خلاف نور کارونه یې کړي وو، پاتې بیا معتادین وو چې له درېیو تر اتو میاشتو یې د بند موده تېره کړې وه او درملنه یې بشپړه شوې وه.»</p>
<p style="text-align: justify;">خوشي شوي کسان خوښ دي چې د اختر له رانږدې کېدو سره خوشي کېږي او له خپلو کورنیو سره یو ځای کېږي.</p>
<p style="text-align: justify;">د نثاراحمد په نوم خوشي شوي کس پژواک اژانس ته وویل، پوره شپږ میاشتې یې په زندان کې تېرې کړې، په دې موده کې یې ښه درملنه شوې او د نشه يي توکو له کارولو څخه یې لاس اخیستی دی.</p>
<p style="text-align: justify;">دی وايي، غواړي خپل عادي ژوند ته دوام ورکړي او هیڅکله بیا نشو ته مخه نه کړي.</p>
<p style="text-align: justify;">یو شمېر نورو بندیانو هم له پژواک سره په خبرو کې یادونه وکړه چې غواړي د سالمو انسانانو په توګه په ټولنه کې ژوند وکړي او له هر ډول ناقانونه کړنو څخه ډډه وکړي.</p>
<p style="text-align: justify;">د کندهار د مرکزي زندان د مسوولینو د معلوماتو له مخې، دا مهال په دغه محبس کې ۱۷۴۲ زندانیان ساتل کېږي چې ۷۸۲ یې په نشو روږد او ۶۳۳ یې په جنايي جرمونو تورن دي.</p>
<p style="text-align: justify;">په دغو زندانیانو کې ۳۸ ښځې او ۵۷ ماشومان هم شامل دي.</p>
