کابل (پژواک، ۲۰ چنګاښ ۱۴۰۱): د افغانستان د کرکټ بورډ مخکينی مشر عزیزالله فضلي د دې ترڅنګ چې د ده په اړه خپاره شوي وروستي راپورونه ناسم بولي، وايي چې حکومت بندي کړی نه و، بلکې په ارګ کې د هغوی "مېلمه" و.
څه باندې يوه اونۍ مخکې (د چنګاښ ۱۲مه) په ټولنیزو شبکو کې داسې عکسونه او ویډیوګانې خپرې شوې چې عزیزالله فضلي له څو ساتونکو او موټرو سره د افغانستان کرکټ بورډ دفتر ته د ننوتلو هڅه کوي، خو د بورډ ساتونکي یې مخه نیسي.
هغه مهال ځينو سرچینو ويلي وو چې فضلي ساتونکو ته ویلي چې له ځانه سره د اسلامي امارت مشر مولوي هبتالله په لاسلیک مکتوب لري چې د کرکټ بورډ مشر مقرر شوی، خو کله چې د بورډ مسئولین د حکومت له چارواکو سره دا خبره شریکوي، هغوی دا موضوع ردوي.
سرچينې زياته کړې وه، وروسته د امنيتي ځواکونو له خوا دی په دې تور نیول شوی چې غوښتل يې په زور کرکټ بورډ ته ننوځي او د دغه بورډ ریاست ونيسي. دغهراز ویل کېدل چې نوموړی له دې امله نیول شوی چې په «جعلي» مکتوب یې ځان د بورډ د مشر ټاکلو هڅه کوله.
خو فضلي تېره ورځ ناوخته په خپل فېسبوک کې د يادې موضوع په تړاو وضاحت ورکړی او ويلي يې دي: «څنګه چې په خواله رسنیو کې د ځینو کسانو له لوري زما د شخصیت وژنه وشوه او په دې تورن شوم چې ګواکې زما سره د شیخ الحدیث امیرالمومنین مبارک جعلي فرمان ده او زه غواړم چې کرکټ بورډ محاصره کړم، زه په کلکه دا غندم او دغه تور یوازې زما شخصیت وژنه بولم. زما سره د شیخ الحدیث امیرالمومنین مبارک اصلي مکتوب موجود ده چې یاد مکتوب ریاست الوزراء عالي مقام د دفتر له ریاست سره شریک کړل شوی هم وو.»
ده همدارنګه کرکټ بورډ ته د چنګاښ په ۱۲مه (د جولای ۳مه) په زور د ننوتلو موضوع رد کړې او ويلي يې دي: «کله چې د کرکټ بورډ دروازې سره منتظر وم، د کرکټ بورډ امنیتي کمرو کې هم لیدل کېږي چې هیڅ ډول د قانون خلاف عمل نه دی ترسره شوی، خو دغه زموږ د انتظار ویډیو چې د کرکټ بورډ امنیتي کمرو څخه خواله رسنیو سره شریک شوې ده، خواله رسنیو ته ویل شوي چې ګواکې زه په کوم زور زیاتي کرکټ بورډ اداره محاصره کوم.»
فضلي لیکلي، ده غوښتل چې د بورډ له مشرانو سره د کرکټ اړوند مسایلو باندې خبرې وکړي.
د کرکټ بورډ دغه مخکيني مشر ریاستالوزراء ته د ده د ورغوښتلو په اړه کښلي چې د يادې شوې ويډيو تر خپرېدو وروسته ده ته احوال ورکړل شوی چې رئیسالوزراء غوښتی، نو تر ماښام وروسته ارګ ته ورغی، هلته يې له رئیسالوزراء سره وکتل او تر خبرو وروسته يې ورته وویل چې د نورو معلوماتو تر ترلاسه کولو پورې به له دوی سره په ارګ کې «مېلمه» وي.
خو ده زياته کړې: «د محترم ریاست الوزراء مقام له لوري تېره ورځ [د اختر لومړۍ ورځ، د چنګاښ ۱۸مه] ناوخته خپل کور ته واستول شوم. اوسمهال زه په خپل کور کې یم او تل حاضر یم چې د ګران هېواد لپاره خدمت وکړم او د دې موضوع په تړاو به نور جزئیات وروسته له تاسو هېوادوالو ته وړاندې کړم.»
هغه څرګنده کړې چې د يادې موضوع په تړاو ځينو خبریالانو ناسم خبر خپور کړی او له دوی یې غوښتي، مخکې له دې چې هېوادوالو ته خبر وړاندې کړي، هغه دې کره او بیا دې خپور کړي.
د يادولو ده چې د حکومت وياندويانو نه د فضلي د نيول کېدو پرمهال څه ويلي و او نه یې هم د نوموړي د يادو خبرو په اړه څرګندونې کړې دي.
عزیزالله فضلي څو کاله مخکې د افغانستان کرکټ بورډ رییس ټاکل شوی و چې له امله یې په ملي لوبډله کې اختلافات رامنځته شول او په یوه ورځني نړۍوال جام کې ملي لوبډلې هیڅ لوبه ونه ګټله او د لوبو پر مهال د لوبغاړو ترمنځ اختلافات راڅرګند شول.
څه موده وروسته هغه له دندې لرې او پر ځای یې ډاکټر حامد شینواری د کرکټ بورډ عمومي رییس وټاکل شو؛ خو کله چې په کابل کې د اشرف غني حکومت سقوط وکړ، نو عزیزالله فضلي یو ځل بیا د اسلامي امارات له مشرانو څخه د مکتوب په ترلاسه کولو ځان د کرکټ بورډ مشر وټاکه.
هغه مهال کرکټ بورډ ویلي و چې فضلي د رياستالوزراء د مرستیال ملا عبد الغنی برادر په ځانګړي فرمان د کرکټ بورډ ادارې عمومي مشر ټاکل شوی دی؛ خو ډېر ژر بېرته له دندې لرې او پر ځای یې پخوانی کرکټر میرویس اشرف د بورډ عمومي مشر وټاکل شو چې تراوسه پورې دغه دنده پرمخ بیايي.
غړيYou need to subscribe to view the full article. Please login or register a new account.
