«کابل کې پر یو پټنځای عملیاتو کې دوه تنه وژل شوي، درې بهرنیان نیول شوي دي»

کابل (پژواک، ۲۹ چنګاښ ۱۴۰۱): د استخباراتو ریاست وایي، د کابل ښار یوولسمې حوزې اړوند سیمه کې یې د «خوارجو» پر یوه پټنځای عملیات ترسره کړي چې له امله یې دوه کسان وژل شوي او درې بهرني غړي یې ژوندي نیول شوي دي.

د استخباراتو لوی ریاست په خپله ټوېټرپاڼه کې لیکلي چې د دغه ریاست ځانګړو ځواکونو یاد عملیات د کابل ښار په «۳۱۵» فامیلي سیمه کې ترسره کړي دي.

سرچینې د جزییاتو له ورکولو پرته لیکلي: «د یادو عملیاتو په پایله کې دوه تنه خوارج ووژل شول، درې تنه مهم بهرني غړي یې له دوه میله کلاشینکوف او یوې تومانچې سره یو ځای ژوندي ونیول شول.»

د استخباراتو ریاست زیاتوي چې له یاد مرکز څخه د «خراسان غږ مجلې د تاجکي ژبې برخې» نشریات تنظیمېدل او اړوند تبليغاتي، دعوتي او مطبوعاتي مواد ورڅخه ژباړل کېدل او خپرېدل.

دا په داسې حال کې ده چې نن سهار هم دغه ریاست ویلي و، ځانګړو ځواکونو یې دوه کسان نیولي چې یوه یې غوښتل په کابل کې د اهل تشیع هېوادوالو پر یوه جومات برید وکړي.