کابل کې د اروپايي ټولنې استازی وايي ماموريت يې پای ته ورسېد

کابل (پژواک، ۱ وږی ۱۴۰۱): په افغانستان کې د اروپايي ټولنې د پلاوي مشر وايي، نن په دغه هېواد کې خپل ماموریت پای ته رسوي او له کابله وځي.

د اروپايي ټولنې د پلاوي مشر ارنوټ پاویلز نن د وږي په لومړۍ نېټه پر خپله ټویټر پاڼه لیکلي: «تاسې کولای شئ یو ډیپلوماټ له افغانستانه وباسئ خو افغانستان د ډیپلوماټانو له لاسه نه شئ ایستلای.»

خو هغه په دې اړه نور وضاحت نه دی ورکړی چې مخاطب یې څوک دی او یا د چا له خوا له افغانستانه ایستل کېږي؟

نوموړي وړاندې لیکلي چې ژر به د ده پر ځای مېرمن رافیلا ایوډیس په افغانستان کې د اروپايي ټولنې د پلاوي د مشرې په توګه وګومارل شي.

یو شمېر کتونکي په دې باور دي چې د اروپايي ټولنې د پلاوي د مشرې په توګه د یوې ښځې ګومارنه په افغانستان کې د ښځو د حقونو د ملاتړ په برخه کې د دغې ټولنې د جدیت په معنا ده.

ارنوټ پاویلز له یوې افغان رسنۍ سره په خپله وروستۍ مرکه کې ویلي وو چې د نجونو د ښوونځیو بیا پرانیستل په افغانستان کې د اروپايي ټولنې تر ټولو مهم لومړیتوب دی.

نوموړي دغه راز د ښځو د کار حق، بشري حقونه، د رسنیو ازادي او د یوه اغېزناک او ټول شموله سیاسي نظام جوړول د اروپايي ټولنې د نورو لومړیتوبونو په توګه یاد کړي وو.

هغه دا هم ویلي و چې په یادو شوو برخو کې د نړیوالې ټولنې غوښتنې د افغانستان په کورنیو چارو کې لاسوهنه نه ده.

هڅه مو وکړه چې له افغانستانه د اروپايي ټولنې د پلاوي د مشر د وتلو په اړه د سرپرست حکومت د ویاندویانو نظر واخلو خو تر دا مهاله یې په دې اړه څه نه دي ویلي.