غزني (پژواک، ۲۶ وږی ۱۴۰۱): د غزني په اندړو ولسوالۍ کې د شلګر ادبي بهیر له خوا مشاعره جوړه شوې وه چې د دغه ولایت ترڅنګ، د بېلابېلو نورو ولایتونو شاعران او فرهنګیان هم وربلل شوي وو.
په مشاعره کې د غزني والي او نورو سیمهییزو چارواکو هم ګډون کړی وو.
د غزني والي مولوي محمداسحاق اخندزاده مشاعرې ته په خپله وینا کې وویل، دا لومړی ځل دی چې د دغه ولایت په اندړو ولسوالۍ کې فرهنګي ناسته او مشاعره جوړېږي.
هغه ځوانان وستایل او یادونه یې وکړه چې د هېواد د پرمختګ په برخه کې د خلکو هیلې دوی ته دي.
د غزني د اطلاعاتو او فرهنګ رییس مولوي حبیبالله مجاهد وویل، د دغه ولایت په نورو ولسوالیو کې هم ورته ادبي او فرهنګي بهیرونه پیلوي.
هغه زیاته کړه، غواړي د دغو بهیرونو او فرهنګي ناستو له لارې د ښوونځیو، مدرسو او پوهنتونونو ترمنځ شته واټن له منځه یوسي.
د شلګر ادبي بهیر مرستیال عبدالرحمن ځلاند وویل، د دوی له خوا د پیل شوي بهیر موخه د ځوانانو ترمنځ د پوهې او مطالعې فرهنګ ته وده ورکول او په ټولنه کې د ناسمو فرهنګونو او دودونو مخنیوی دی.
د غزني پوهنتون استاد نقیبالله جانیخېل وویل چې دغه ډول ادبي بهیرونه د فرهنګي سړیو او کړیو ترمنځ اړیکې ټینګوي او ځوانان د پوهې، تفکر او مطالعې پر لور بیايي.
هغه زیاته کړه، اندړو ولسوالي پخوا د هېواد په کچه تر ټولو ناامنه ولسوالي وه خو اوس چې امن شوې، مشاعره په کې جوړه شوې او د هېواد له ګوټ ګوټ څخه خلک ورته راغلي دي.
له ننګرهاره مشاعرې ته راغلي شاعر جاوېد دلدار هم وویل چې پخوا له غزني د جګړو خبرونه خپرېدل خو اوس په کې فرهنګي او ادبي فعالیتونه کېږي.
دی وايي، دغه ډول فرهنګي فعالیتونه د قومونو ترمنځ یووالي ته لار پرانیزي او په ټولنه کې تاوتریخوالی کموي.
په یاده مشاعره کې له غزني او نورو ولایتونو لکه، ننګرهار، خوست، زابل، پکتیکا، لوګر، فراه، تخار او میدان وردګو څخه راغلو شاعرانو خپل شعرونه واورول او ځینو په کې ترنم وکړ.
د مشاعرې وروستۍ برخه ورزشي نندارو او تیاتر ته ځانګړې شوې وه چې د برخهوالو له تاوده هرکلي سره مخ شوه.
غړيYou need to subscribe to view the full article. Please login or register a new account.
