خوست ښار (پژواک، ۲۸ وږی ۱۴۰۱): د لوړو زدهکړو سرپرست وزير وايي چې د هېواد د تحصیلي بنسټونو د پیاوړتیا لپاره پر يوه منظم پلان کار روان دی.
سرپرست وزير عبدالباقي حقاني دا څرګندونې نن (د وږي ۲۸مه) د خوست په شيخ زايد پوهنتون کې د يوه خبري کنفرانس پرمهال وکړې.
نوموړي وويل، د لوړو زدهکړو د ښهوالي لپاره یې په ټول هېواد کې د اسلامي ثقافت لپاره ۸۵۶ نوي بستونه منظور کړي چې دا مهال يې د استادانو د جذب پروسه روانه ده.
حقاني زیاته کړه، د تحصیلي بنسټونو د پیاوړتیا لپاره په هېواد کې بېلابېلې برنامې تر کار لاندې دي او په هغو پوهنتونونو کې چې د شرعیاتو پوهنځي نه وو، هلته یې دغه پوهنځي منظور کړي دي.
نوموړي همدارنګه وویل چې پر دې سربېره يې په هر پوهنتون کې د دعوت ارشاد دوه بستونه هم ایجاد کړي چې له مخې به يې د استادانو او محصلينو ديني اړتياوې پوره شي.
ده زياته کړه: «موږ دې ته هم متوجه یو چې څنګه د دغه ملک تحصیلي نهادونه مضبوط، قوي او معیاري شي او دغه تحصيلي نهادونه څنګه وکولای شي چې دا وران افغانستان بیا اباد کړي او دغه خپل ملک خودکفا او له نورو هېوادو سره سیال کړي.»
په ورته وخت کې، د لوړو زدهکړو وزارت د محصلانو چارو علمي مرستیال سید اسماعېل روحاني وايي، د هېواد په کچه په «۱۸۰» دولتي او خصوصي پوهنتونونو کې منظم تدريس روان دی او زياتوي چې سږ کال به د نویو محصلینو د جذب ظرفیت هم لوړ شي.
هغه دغهراز په خپلو خبرو کې وويل چې که څه هم د قزاقستان، ازبکستان او ترکيې په ګډون ځينو نورو هېوادونو افغان محصلينو ته تحصيلي بورسونه ورکړي، خو په وينا يې چې د بهرنيو اړيکو د نه لرلو له امله زيات بورسونه نه لري.
هغه وايي: «اوسمهال د خارجي اړیکو د نه سمون په خاطر موږ خاص نور بهرني سکالرشیپونه نه لرو او د هېواد په پوهنتونونو کې هغه که شخصي او که دولتي دي ټولو د هېواد بچیانو ته د زدهکړو زمینهسازي شوې ده.»
د یادولو ده چې په هېواد کې له وروستي سياسي بدلون سره، د دولتي پوهنتونونو د استادانو معاشونه کم شوي چې د بېرته لوړولو غوښتنه یې کوي.
غړيYou need to subscribe to view the full article. Please login or register a new account.










