<p style="text-align: justify;">لښکرګاه (پژواک،۳۰ وږی ۱۴۰۱): د هلمند د اطلاعاتو او فرهنګ ریاست وايي، نن سهار د دغه ولایت په نادعلي ولسوالۍ کې یوه ماشومه ژورې څاه ته لوېدلې وه چې له را ایستل کېدو وروسته يې په روغتون کې ساه ورکړه.</p>
<p style="text-align: justify;">پژواک خبري اژانس موندلي چې په افغانستان کې په تېرو شاوخوا اووه میاشتو کې څاهګانو ته د یوې امیدوارې مېرمنې او ۱۶ ماشومانو لوېدو خبرونه خپاره شوي او له دې ډلې پنځه ماشومان ژغورل شوي خو ۱۳ نور مړه شوي دي.</p>
<p style="text-align: justify;">په یاده موده کې نهه ماشومان د هلمند په ګرشک، نوزاد، نادعلي، ګرمسېر، موسیکلا او کجکي ولسوالیو کې څاهګانو ته لوېدلي چې شپږ یې مړه او درې نور ژغورل شوي دي.</p>
<p style="text-align: justify;">د هلمند د اطلاعاتو او فرهنګ ریاست مرستیال مولوي محمدقاسم ریاض پژواک ته وویل: «نن سهار (د وږي۳۰مه) د نادعلي ولسوالۍ د شنیې جامع د د ښت په سیمه کې یوه وړه ماشومه ژورې څاه ته لویدلې چې له را ايستل کېدو وروسته يې په روغتون کې ساه ورکړې ده.»</p>
<p style="text-align: justify;">نوموړی وایي، د انجنیرۍ ټیم او ورسره امنیتي مسوولین هم سيمې ته ورسېدل، خو ماشومې له څاه څخه تر ايستل کېدو وروسته په روغتون کې ساه ورکړه.</p>
