پلعلم (پژواک، ۳۱ وږی ۱۴۰۱): د لوګر د اوبو رسونې ادارې مسوولین وایي، له برېښنا ادارې سره په ګډه یې د مرکز پلعلم ښار په «خواجه محمد افضل» سیمه کې د برېښنا یو تراسفرمر نصب کړ چې ۴ زره کورنیو ته به ۲۴ ساعته د څښاک پاکو اوبو رسولو ظرفیت ولري.
د اوبو رسونې ادارې امر انجنیر ثمرګل ګلزار پژواک خبري اژانس ته وویل چې د ۴.۳ میلیون افغانیو په مالي لګښت د برېښنا یو ټرانسفرمر جوړ او نن ګټې اخیستنې ته وسپارل شو.
هغه زیاته کړه چې یاد ټرانسفرمر ۴۰۰ کیلوواټ ظرفیت لري او د ښار سلګونه متره مربع سیمو ته د برېښنا له لارې ۲۴ ساعته د اوبو رسولو ظرفیت لري.
دی وايي، اوس مهال د دې پروژې له پرانیستې سره د مرکز پلعلم ښار ۴ زره کورنیو د څښاک پاکو اوبو ستونزه هواره شوه او په پام کې ده چې ورته پروژې د لوګر ولایت په نورو سیمو کې هم عملي کړي.
بلخوا د لوګر والي مولوي عنایتالله شجاع جوړ شوو مراسمو ته وویل چې د مرکز پلعلم ډېری اوسېدونکي اوس مهال د څښاک پاکو اوبو ته لاسرسی لري او ولایتي ادارې له یو شمېر نورو کورنیو او نړۍوالو موسسو سره په ګډه کار کوي چې د دغه ښار پاتې برخو ته هم د نلونو له لارې پاکې اوبه ورسوي.
نوموړي د لوګر ولایت پر اوسېدونکو غږ وکړ چې د دولت له لوري د پلې کېدونکو پروژو ملاتړ او ساتنه وکړي.
د پلعلم ښار یوه اوسېدونکي محمدخالد پژواک خبري اژانس ته وویل چې د پخوا په پرتله د دغه ښار اوسېدونکو پرمختګ کړی او اوس مهال ۲۴ ساعته برېښنا او د څښاک پاکو اوبو ته لاسرسی لري.
نوموړي غوښتنه وکړه چې د پلعلم ښار لویې لارې او واټونه دې هم په پاخه او اساسي ډول جوړ شي څو خلکو ته لا ډېرې اسانتیاوې برابرې شي.
تېره ورځ هم د لوګر ولایت د کلیو پراختیا او بیارغونې ریاست له لوري د لوګر ولایت څرخ ولسوالۍ په «ابجوش» سیمه کې د څښاک پاکو اوبو یوه شبکه پرانیستل شوه چې د دغې شبکې له لارې ۳۰۰ کورنیو ته د څښاک پاکې اوبه برابرې شوې.
Visits: 38
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن