اټلانټا (پژواک، ۳۰ وږی ۱۴۰۱): د کار او ټولنيزو چارو وزارت په راتلونکو شپږو میاشتو کې د مرکزي او ولایتي امارتي ادارو د کارکوونکو د کار پيل او پای وختونه مشخص کړل.
د باختر آژانس د خبر له مخې، یاد وزارت ویلي، مرکزي او ولایتي امارتي ادارو د کارکوونکو د کار د پيل او پای وختونه د ۱۴۴۴ هجري قمري کال د صفرالمظفر ۲۶مه چې د ۱۴۰۱ هجري شمسي کال د تلې (میزان) له لومړۍ نېټې سره برابره ده؛ د شعبان المعظم تر ۲۷مې پورې د کب (حوت) له ۲۹مې سره سمون خوري؛ په لاندې ډول تنظیم شوي دي:
سرچینې زیاته کړې، له شنبې تر چهارشنبې پورې، د کار پيل د سهار ۸ بجې او ۳۰ دقیقې او له (۱) بجې څخه تر (۲) بجو پورې د لمانځه د اداکولو او ډوډۍ خوړلو لپاره د يو ساعت ځنډ په پام کې نيولو سره، د کار ختم د مازیګر ۳ بجې او ۳۰ دقیقې ټاکل شوې دي.
دغه راز د پنجشنبې په ورځو کې، د کار پيل د سهار۸ بجې او ۳۰ دقیقې او د کار پاى له غرمې وروسته یوه نیمه بجه ده.
همدا رنګه، په یاده خبرتیا کې ټولو توليدي، خدماتي او د دايمي فعالو برخو موسسې (کاري شفتونو تنظیم)، نشراتي، روغتيايي، پوهنې او د لوړو زده کړه موسسو ته سپارښتنه شوې چې د کار وختونه د کاري ځانګړتیاوو، اقليمي شرايطو او له اړوندو لايحو او مقررو سره سم، خپل کاري وختونه د کال په راتلونکو شپږو میاشتو کې په اوونۍ کې په ۳۵ ساعته توګه تنظیم کړي.
Visits: 1773
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن