<p style="text-align: justify;">کابل (پژواک، ۹ تله ۱۴۰۱): د کابل امنیه قوماندانۍ مسوولین وایي، د کابل له بېلابېلو سیمو څخه يې د عملیاتو پرمهال د نشهيي توکو د کاروبار په تور ۱۲ کسان نيولي دي.</p>
<p style="text-align: justify;">د کابل امنیه قوماندانۍ له خوا په خپره شوې ويډيو کې، د نشهیي توکو پر وړاندې د مبارزې مدیر عبدالله عزیزي له قوله راغلي چې دغه کسان د کابل له (۷مې، ۸مې، ۹مې، ۱۰مې، ۱۲مې او ۱۶مې) اړوندو حوزو او د کابل میربچه کوټ ولسوالۍ څخه د ځانګړو عملیاتو په ترڅ کې نيول شوي دي.</p>
<p style="text-align: justify;">ده زياته کړې، له دغو کسانو څخه ۳۲ کیلوګرامه چرس، ۲۱۰۰ قرصه ټابلیټ کا، درې موټرونه، ۴۵۰ زره کلدارې، ۲۳۰ زره افغانۍ او یوه اندازه شراب ترلاسه شوي دي.</p>
<p style="text-align: justify;">د هغه په وينا، د نیول شویو کسانو دوسیې بشپړې او اړوند ارګان ته لېږدول شوې دي.</p>
<p style="text-align: justify;">خو سرچينې دا نه دي ويلي چې دغه کسان څه وخت او په څومره موده کې نيول شوي دي.</p>
<p style="text-align: justify;">دغه کسان په داسې حال کې نیول کېږي چې د تلې په ۳مه، د کابل ښار یوولسمې امنیتي حوزې اړوند سیمه کې هم د موټرو د غلا په تور د غلو یوه اووه کسیزه ډله نیول شوې وه.</p>
