پلخمري (پژواک، ۲۲ لېندۍ ۱۴۰۱): د بغلان د ترافیکو مديريت وايي، د دغه ولایت په مرکز پلخمري کې د ترافیکې پېښې له امله دوه کسان مړه او د یوه ماشوم په ګډون پنځه نور ټپیان شوي دي.
د بغلان د ترافیکو مدیریت د ترافیکي پېښو څانګې امر دويم څارمن صفيالله د لېندۍ په ۲۲مه پژواک خبري اژانس ته وویل چې تېر ماښام شپږنیمې بجې د پلخمري اړوند په خواجه الوان سیمه کې يو کرولا او فورنر موټر ټکر کړى دى.
هغه وايي چې په دې پېښه کې دوه کسان مړه شوي او د يوه ماشوم په ګډون پنځه نور کسان ټپيان شوي دي.
دغهراز د بغلان ولایت د عامې روغتیا ریاست ویاند عبدالله ملنګ وایي چې له يادې ترافيکي پېښې دوه مړي او شپږ ټپيان روغتون ته انتقال شوي دي.
د يادونې ده، په دې وروستيو کې د بغلان ولايت په مربوطاتو کې ترافيکي پېښې ډېرې شوې دي چې له امله يې لسګونو کسانو ته مرګژوبله اوښتې ده.
