[restrict paid="true"]
اټلانټا (پژواک، ۲۹ لېندۍ ۱۴۰۱): د افغانستان سرپرست حکومت ځینو چارواکو او ملاتړو یې د نجونو لوړو زدهکړو ځنډولو پر پرېکړې خواشيني ښودلې ده.
د لوړو زدهکړو وزارت نن وویل چې په هېواد کې د نجونو لوړې زدهکړې تر بل امر پورې وځنډول شوې.
د دغه وزارت په خبرتیا کې راغلي: «د هېواد ټولو دولتي او خصوصي پوهنتونونو ته خبر ورکول کېږي چې د ۱۴۴۳ هجري قمري کال د کابینې ۲۸مې ګڼې مصوبې پرېکړې له مخې، د اناثو تحصیل هم تر امر ثاني پورې معطل شو.»
که له یوې خوا نړۍوالې ټولنې، افغان سیاستوالو او ډېرو عامو افغانانو دا پرېکړه غندلې نو له بلې خوا د سرپرست حکومت یو شمېر چارواکو او ملاتړو هم له دې پرېکړې سره مخالفت څرګند کړی دی.
د افغانستان د ملي اولمپیک کمېټۍ مشر نظرمحمد مطمين له یادې پرېکړې وروسته پر خپل ټویټر لیکلي: «ښه به وای نه مې ټويټر، نه فېسبوک، نه راډيو/ ټلوېزيون کتلای. لرې مې په غرنيو سيمو کې کور وای، نه مې دنده او نه هم مسووليت درلودای، نه چا ګيله راڅخه کولی او نه مې له چا ګيله کولای؛ داسې پرېکړې زموږ دښمنان زياتوي، له ولس سره فاصلې نيولو پای پر جګړو وي، ولس هر کله پر حکومت برلاسی وي.»
د ولید ستوري په نوم یوه کس په ځواب کې ورته لیکلي: «اوس هم چا نه یې ایسار کړی، ښه نر غوندې استعفا وکه او لاړ شه چېرته دښته کې واړوه، ښه بېغمه ژوند به دې وي.»
د بهرنیو چارو وزارت د اقتصادي اړیکو رییس شفیع اعظم هم له یادې پرېکړې وروسته پر خپل ټویټر لیکلي: «خدایه! ته مو هغو حریفانو ته مه شرموه چې همدې کابل کې مو ورسره ستا د دین او نظام پر سر حتا د دښمنۍ پولې ماتې کړې.»
اعظم پر دغه ټویټ د یوه کس د نیوکې په ځواب کې لیکلي، ده هیڅکله د څوکۍ یا مقام لپاره مبارزه نه ده کړې، بلکې د اسلامي نظام لپاره یې دا هرڅه کړي.
د بهرنیو چارو وزارت د معلوماتي ټکنالوجۍ رئیس خیرالله شینواري هم د لوړو زدهکړو وزارت د یادې پرېکړې له خپرېدو وروسته پر ټویټر لیکلي: «ربه موږ خو ستا په دین او بندهګانو ننګ کړی و، تا چې له هغو سختو او ترخو مرحلو راتېر کړو، اوس مو هم په دې امتحانونو کې بریالي راوباسه؛ افغانان نور د غمیزو او بدبختیو زغم نه لري، افغانستان نور د بحرانونو وس نه لري، ته یې په خپله ملګری شه، ښکاري د بندګانو دې له وس پورته ده.»
د پوهنتون استاد او د اوسني سرپرست حکومت ملاتړی ډاکټر فیضمحمد ځلاند د یادې پرېکړې مکتوب خپور کړی او ورسره لیکلي یې دي: «د څو خواخوږو، مظلومو افغانانو پوښتنې: که د دې پرېکړې له امله په لاریونونو کې څوک ووژل شي، يا څوک ځانوژنه وکړي يا څوک له هېواده ووځي او د کفر او فتنو ښکار شي، د الله تعالی په وړاندې به يې مسووليت د چا پر غاړه وي؟
هغه پر ټویټر یو شعر هم خپور کړی:
کاڼي راواخلئ ما سنګسار کړئ ګناهکار یم خلکو
زه له تیارې سره ولاړ په یوه لار یم خلکو
د دې وطن په ښکلاګانو پورې چا وخندل
زه په ګلانو کې قاتل ګل د کوکنار یم خلکو
لمن لمن اوښکې ګرځومه در په در ګرځمه
زه لېونی ګرېوان شلېدلی تار په تار یم خلکو
دغه راز د سرپرست حکومت یو بل غړی او ملاتړکوونکی جنرال مبین خان پر ټویټر د یادې پرېکړې مکتوب خپور کړی او لیکلي یې دي: «بس الله دې پر افغانانو رحم وکړي.»
هغه له دې وروسته په بل ټویټ کې لیکلي: «هېواده، خدای پامان، الله دې مل شه.»
خو یو ساعت وروسته یې بل ټویټ کې داسې لیکلي: «مبارزه! ما او تا هغه وخت اطاعت کاوه چې په سر مو لسګونه ډوله غربي طیارې ګرځېدې، نو اوس ولې د امیر امر نه منو، هغه امیر چې موږ یې په امر ځانونه لولپه کول. په امر کې خیر دی او په اطاعت کې مو د دنیا او آخرت سعادت دی.»
دغه راز ګڼ شمېر کسانو د سرپرست حکومت د دې پرېکړې په ملاتړ او مخالفت کې په ټولنیزو شبکو کې پوسټونه کړي دي.
/restrict]
GET IN TOUCH
NEWSLETTER
SUGGEST A STORY
PAJHWOK MOBILE APP