<p style="text-align: justify;">ميدانښار (پژواک، ۸ مرغومی ۱۴۰۱): د میدانوردګو یو شمېر اوسېدونکي وايي، په دغه ولایت کې ډېری تاریخي ځایونه د تخريبېدو له ګواښ سره مخ دي.</p>
<p style="text-align: justify;">د میدانوردګو د چک ولسوالۍ یوه اوسېدونکي محمدحامد بها پژواک خبري آژانس ته وویل، په دغه ولایت کې ډېر داسې ځایونه شته چې د هېواد تاريخي هویت ګڼل کېږي او ساتنه يې د خلکو او حکومت ګډ مسوولیت دی.</p>
<p style="text-align: justify;">ده وویل: «وردګ یو تاریخي ولایت دی، ډېرې داسې ابدې لري چې لرغونتوب يې شاوخوا ۳۰۰ کلونو ته رسېږي او دا د هېواد د هویت لپاره ارزښت لري، خلک او حکومت یې باید په ګډه ساتنه وکړي.»</p>
<p style="text-align: justify;">نوموړي زیاته کړه، د دوی په سیمه کې د ګوډه نههبرجه کلا، د بسکمند حسین کلا او چک بند ته څېرمه د پخواني پاچا محمدظاهرشاه هوټل تاریخي ځایونه دي خو په وینا يې، اوس يې ډېرې برخې تخریب شوې دي.</p>
<p style="text-align: justify;">د دغه ولایت د دایمیرداد ولسوالۍ اوسېدونکی محمدوصیل صالحي هم وايي، د دوی په سیمه کې ډېر لرغوني ځایونه شته چې اوس د ویجاړېدو له ګواښ سره مخ دي.</p>
<p style="text-align: justify;">ده وویل: «دلته ډېر لرغونې اثار چې د هېواد په کچه شهرت لري، وران شوي او پخوانی حالت یې له لاسه ورکړی دی، دا د مېړانې تاریخونه او ویاړونه باید وساتل شي څو راتلونکي نسلونه ورباندې وویاړي.»</p>
<p style="text-align: justify;">د دغه ولایت لیکوال او شاعر احسانالله بمبيوال پخواني اثار او ځایونه د هېواد ملي شتمني او ساتنه يې د ملت او حکومت ګډ مسوولیت ګڼي.</p>
<p style="text-align: justify;">هغه وویل: «په دایمیرداد ولسوالۍ کې کافرکلا، کلاخ بتان، ارګ او نرخ ولسوالۍ کې تر ځمکې لاندې د الغتا ښارګوټی تاریخي ځایونه دي چې زموږ د هېواد له هویت سره تړاو لري.»</p>
<p style="text-align: justify;">نوموړي له حکومته وغوښتل چې د تخریب له ګواښ سره مخ تاریخي ځایونه دې بېرته ترمیم کړي او د ورانېدو مخه دې يې ونيسي.</p>
<p style="text-align: justify;">بلخوا د ولایت مسوولین وايي، د تاریخي ځایونو ساتنې ته ژمن دي او د ورانېدو مخه يې نیسي.</p>
<p style="text-align: justify;">د یاد ولایت د اطلاعاتو او کلتور ریاست د تاریخي ابداتو او میراثونو مدیر محمدنسیم رسا پژواک خبري آژانس ته وویل، د ولایت په کچه ۷۶ تاریخي ځایونه شتون لري چې ۱۸ یې په رسمي ډول له اطلاعاتو او کلتور وزارت سره ثبت شوي دي.</p>
<p style="text-align: justify;">رسا وویل، هڅه یې دا ده چې د ولایت په کچه ټول لرغوني اثار او ځایونه ثبت کړي څو د غصب او ویجاړېدو مخه يې ونیول شي.</p>
<p style="text-align: justify;">د اطلاعاتو او کلتور رئیس مولوي حبیبالله مجاهد هم ژمنه وکړه چې له دغو تاریخي ځایونو او اثارو به ساتنه کوي او چا ته به یې د خپلسرو کیندنو او تخریبولو اجازه ورنه کړي.</p>
<p style="text-align: justify;">مجاهد وویل: «موږ به دغه لرغوني اثار له نږدې وګورو او ترمیم ته به یې ځانګړې پاملرنه وکړو.»</p>
<p style="text-align: justify;">نوموړي زیاته کړه، د هېواد لرغونو اثارو د ساتنې په موخه د ولایت په کچه د یو نظامي موزیم جوړولو پلان لري چې په وینا يې، د شوروي او امریکا د وخت ویجاړ شوي نظامي وسایط او تجهیزات به په کې د یو ژوندي تاریخ په بڼه ساتل کېږي.</p>
