<blockquote>کابل (پژواک، ۹ مرغومی ۱۴۰۱): سرچینې وايي چې په پاکستان کې د ښځو او ماشومانو په ګډون ۱۲۰۰ افغان کډوال د قانوني سندونو نه لرلو له امله نیول شوي او بندیان دي.</blockquote>
اسوشیټېډ پرېس خبري اژانس تېره ورځ د پاکستان د پولیسو او چارواکو له قوله <a href="https://bit.ly/3vsxaxy"><strong>خبر</strong></a> ورکړی چې د دغه هېواد په زندانونو کې د ښځو او ماشومانو په ګډون ۱۲۰۰ افغان کډوال پراته دي.
سرچینې لیکلي، دغه کسان د قانوني اسناد نه درلودو له امله نیول شوي دي.
د یاد خبر له مخې، پولیسو او سیمهییزو حکومتي چارواکو ویلي چې نیول شوي کسان به د هغوی د دوسیو له بشپړېدو وروسته ازاد او بېرته خپل هېواد ته ستانه شي.
دا په داسې حال کې ده چې په اسلاماباد کې د افغانستان سفارت تېره ورځ (د مرغومي ۸مه) په خپله <a href="https://twitter.com/AfghanembassyI1/status/1608421262526746625">ټویټرپاڼه</a> کې ليکلي وو: «په اسلام اباد کې د ا.ا.ا له سفارت او افغان جنرل قونسلګریو سره د پاکستاني ادارو او چارواکو له ژمنو سره سره لا هم په پاکستان، په ځانګړي ډول سند ایالت کې د ښځو او ماشومانو په ګډون نیول شوي افغانان له زندانونو نه دي خوشي شوي.»
سرچينې بیا هم پر پاکستاني چارواکو غږ کړی و چې په یاد هېواد کې د مېشتو او مسافرو افغانانو، په تېره بیا د ښځو، ماشومانو، سپینږیرو او ناروغانو زنداني کول او ځورونه خورا دردوونکې ده.
