لوګر کې د ترافیکي پېښې له امله ۸ کسان ټپیان شوي

پل علم (پژواک، ۱ سلواغه ۱۴۰۱): د لوګر په محمداغې ولسوالۍ کې د یوې ترافیکي پېښې له امله د ښځو او ماشومانو په ګډون ۸ کسان ټپیان شوي دي.

د لوګر د امنیې قوماندانۍ ویاند احمدالله انس پژواک خبري اژانس ته وویل، پېښه نن سهار د یادې ولسوالۍ په زاهداباد سیمه کې شوې ده.

هغه زیاته کړه، یو سراچه موټر چې له محمداغې ولسوالۍ مرکز پل علم ته روان و، د لارې په اوږدو کې له سړکه اوښتی او چپه شوی چې په کې سپاره ۸ کسان ټپیان شوي دي.

نوموړی وايي، په ټپيانو کې ۶ ښځې، یو نارینه او یو ماشوم شامل دي چې د درملنې لپاره ولایتي روغتون ته لېږدول شوي دي.

هغه زیاته کړه، پېښه د موټرچلوونکي د ګړندي تګ او بې‌احتیاطۍ له امله شوې ده.

د پېښې یوه عیني شاهد او موټرچلوونکي رحیم‌الله پژواک خبري اژانس ته وویل، په ټپيانو کې د ۴ کسانو روغتیايي حالت ښه نه و چې د درملنې لپاره پلازمینې کابل ته ولېږدول شول.

تېره اونۍ هم د کابل- ګردېز پر عمومي سړک په خضر او تېر سیمو کې د دوو جلا ټرافیکي پېښو له امله ۸ کسان مړه او دوه نور ټپيان شوي وو.