<p style="text-align: justify;">کابل (پژواک، ۱۷ کب ۱۴۰۱): د کورنیو چارو وزارت له نشهیي توکو سره د مبارزي برخه کې د سیمې او نړۍ هېوادونو ته ډاډ ورکړ او له نړۍ یې هم وغوښتل چې له افغانستان سره په دې برخې کې اړینې مرستې وکړي.</p>
<p style="text-align: justify;">له نشهیي توکو سره د مبارزې معینیت مسوولین د سیمې او نړۍ هېوادونو ته ډاډ ورکړ چې له نشهیي توکو سره د مبارزې لپاره پیاوړی هوډ لري او له نړۍ په یاده برخه د مالي او تخنیکي مرستو غوښتنه کوي.</p>
<p style="text-align: justify;">نن (د کب ۱۷مه) د کابل په انټرکانټیننټال هوټل کې «له نشهیي توکو سره د مبارزه او پر افغانستان، سیمه او نړۍ یې اغېزې» تر سرلیک لاندې د کورنیو چارو وزارت او د نشهیي توکو پر وړاندې د مبارزې معینیت له خوا غونډه جوړه شوې وه.</p>
<p style="text-align: justify;">په غونډه کې د کورنیو چارو وزارت د نشهیي توکو پر وړاندې د مبارزې معینیت د دفتر رییس مولوي حسیبالله احمدي په افغانستان کي له نشهیي توکو سره مبارزه بریالۍ وبلله.</p>
<p style="text-align: justify;">هغه زیاته کړه چې اسلامي امارت له نشهیي توکو سره مبارزه پر مخ وړي، خو په دې برخه کې د سیمې او نړۍ هېوادونو مرستو ته هم جدي اړتیا ده.</p>
<p style="text-align: justify;">نوموړي د سیمې او نړۍ هېوادونو ته ډاډ ورکړ، ویې ویل چې د افغانستان سرپرست حکومت له نشهیي توکو سره د مبارزې لپاره پیاوړی هوډ لري.</p>
<p style="text-align: justify;">احمدي له نړۍ وغوښتل چې له نشهیي توکو سره مبارزه کې دې له اسلامي امارت سره همکاري وکړي.</p>
<p style="text-align: justify;">د کورنیو چارو وزارت اداري مرستیال نورجلال جلال په نننۍ ناسته کې وویل چې که نړۍ په رښتیني ډول د بشر حقونو مدافع وي، نو د افغانستان له بزګرانو سره دې د بدیل معیشت برخه کې دومره مرسته وکړي چې بیا نشهیي توکي ونه کري.</p>
<p style="text-align: justify;">هغه د روږدو کسانو د درملنې په برخه کې هم له نړۍ د مرستې غوښتنه وکړه.</p>
<p style="text-align: justify;">نوموړي پر نړۍوالو او بشرپالو بنسټونو غږ وکړ چې د نشهیي توکو کنټرول او د له منځه وړو برخه کې دې مالي او تخنیکي مرسته وکړي.</p>
<p style="text-align: justify;">په یاده غونډه کې د کورنیو چارو وزارت د نشهیي توکو پر وړاندې د مبارزې معینیت د مبارزې عملیاتي رییس مفتي محمدالله احمدي وویل، له هغه وخته چې د اسلامي امارت د فرمان له مخې د نشهیي توکو پر کښت، قاچاق او کارونې بندیز لګول شوی، د ټول هېواد په کچه ۴۶۰۸ عملیات ترسره شوي چې په پایله کې یې ۵۴۵۷ کسان د نشهیي توکو په تړاو نیول شوي، ۷۵۹ بېلابېل نشهیي توکي نیول شوي، ۱۹۷۳هکټاره ځمکه د نشهیي توکو له کښته پاکه شوې او ۱۸۲ د دغو توکو کوچنۍ او لویې د تولید او پروسس کارخونې له منځه تللې دي.</p>
<p style="text-align: justify;">هغه زیاته کړه، په ټول هېواد کې ۸۲ زره او ۹۵۴ روږدي کسان د درملنې لپاره روغتیايي مرکزونو ته لېږدول شوي دي.</p>
