سرپل (پژواک، ۲۲ کب ۱۴۰۱): په سرپل کې یو شمېر فرهنګیانو نن د دغه ولایت له مسوولینو سره په ناسته کې غوښتنه وکړه چې دوی ته دې پر حکومتي پروژو د څارنې رول ورکړي.
ځايي چارواکو هم د یاد ولايت د فرهنګیانو د دې غوښتنې هرکلى کړی او ویلي، د دوى څارنه به په چارو کې د پرمختګ او اصلاحاتو باعث شي.
د سرپل ولايت يوه فرهنګي حکمتالله حيدري پژواک خبري اژانس ته وويل، دوى بايد د حکومتي پروژو له پلې کېدو څارنه وکړي.
هغه وویل: «که چېرې محلي حکومت په دې برخه کې له فرهنګیانو سره همغږی شي او د څارنې اجازه ورکړي، د بیتالمال پیسې به په شفافه او اغېزناکه توګه مصرف شي.»
د هغه په وینا: «په ټولنه کې د فرهنګیانو فعالیت به د ښه مسوولیت منلو او اصلاحاتو لامل شي، له همدې امله له حکومته غوښتنه کوو چې فرهنګیانو ته د حکومتي کارونو په څارنه کې نقش ورکړي څو په حکومتي چارو کې موثریت رامنځته شي.»
د یاد ولايت د فرهنګیانو له ډلې استاد احسانالله وويل: «که فرهنګیان د حکومت کارونه او پروګرامونه په اصلاحي توګه وڅاري، مثبتې پایلې به ولري.»
د سرپل ولايت د اطلاعاتو او فرهنګ رييس مفتي عمیر سرپلي په دې غونډه کې د فرهنګيانو له غوښتنې هرکلى وکړ.
هغه وویل: «حکومت د فرهنګیانو له خوا د حکومتي چارو او پروګرامونو څارنې په برخه کې هېڅ ستونزه نه لري، د فرهنګیانو له خوا د حکومت د کړنو څارنه په ټولنه کې د پرمختګ او پرمختیا لامل کېږي.»
د سرپل ولايت د اطلاعاتو او فرهنګ رييس وويل، د فرهنګيانو ټولې غوښتنې به له حکومتي مسوولینو سره شريکې کړي.
غړيYou need to subscribe to view the full article. Please login or register a new account.
