<p style="text-align: justify;">کابل (پژواک، ۱۹ وری ۱۴۰۲): د بهرنیو چاور وزارت سرپرست د دوحې تړون د ستونزو حل لپاره یو ښه چوکاټ بولي، خو زیاتوي چې په بینالافغاني مذاکراتو کې له مقابل لوري سره اختیارات نه وو، نو ځکه یې پایله ور نهکړه.</p>
<p style="text-align: justify;">مولوي امیرخان متقي دغه څرګندونې له یوه عربي ټلوېزيون «دُرر» سره په مرکه کې کړې چې د دغه وزارت مرستیال ویاند حافظ ضیااحمد تکل یې یوه برخه نن د وري په ۱۹مه، په خپله <strong><a href="https://twitter.com/HafizZiaAhmad1/status/1644588447410053121">ټویټرپاڼه</a> </strong>کې خپره کړې ده.</p>
<p style="text-align: justify;">متقي ویلي، د دوحې په تړون کې د اسلامي امارت مسوولیتونه هم معلوم وو او د امریکا او د هغوی د متحدینو مسوولیتونه هم.</p>
<p style="text-align: justify;">نوموړی وايي، د اسلامي امارت مسوولیت دا و چې د ۱۴ میاشتو په لړ کې به بهرنیو ځواکونو ته د وتلو لار برابروي او پر هغوی به بریدونه نه کوي؛ بل مسوولیت یې دا و چې د افغانستان خاوره به د چا پر ضد نه کارول کېږي.</p>
<p style="text-align: justify;">هغه زیاتوي: «درېیمه خبره د بینالافغاني مذاکراتو پیلول وو چې هغه هم پیل شول او دوام یې وکړ، خو په مقابل لوري کې د مذاکراتو پر مېز یو متحد نظر او فکر موجود نه و، اختیارات نه وو ورسره، له بېلابېلو ډلو څخه خلک په کې راټول شوي وو؛ نو ځکه پرمختګ و نهشو.»</p>
<p style="text-align: justify;">د نوموړي په خبره، د امریکا په مسوولیتونو کې لومړی مسوولیت دا و چې په درېیو میاشتو کې به د دوی ۵ زره بندیان ازادوي، خو د بندیانو خلاصون لس میاشتې وخت واخیست چې بینالافغاني مذاکرات یې هم وځنډول.</p>
<p style="text-align: justify;">دغهراز متقي یادونه وکړه چې امریکا ژمنه کړې وه د دوی پاتې نور بندیان به هم په درېیو میاشتو کې خوشي کوي، خو تر پایه یې ازاد نه کړل چې بالاخره په خپله اسلامي امارت د افغانستان له نیولو سره ازاد کړل.</p>
<p style="text-align: justify;">متقي وویل، د دوحې تړون له مخې، د امریکا مسوولیت دا و چې د اسلامي امارت د غړو نومونه به له تور لېسته وباسي او د افغانستان په چارو کې به لاسوهنه نه کوي، خو تر اوسه یې دا ژمنې عملي کړې نه دي.</p>
<p style="text-align: justify;">نوموړي امریکا تورنه کړه چې اوس هم د افغانستان په چارو کې لاسه وهنه کوي او د هېواد په فضا کې اوس هم وخت نا وخته د دوی الوتکې لېدل کېږي.</p>
<p style="text-align: justify;">د متقي تازه څرګندونې داسې مهال دي چې امریکا هم په وار وار اسلامي امارت د دوحې تړون پر نقض کولو تورن کړی دی.</p>
