استخبارات: کابل کې اووه «غله» نیول شوي او یو وژل شوی دی

کابل (پژواک، ۱۲ غويی ۱۴۰۲): د استخباراتو رياست وايي، له هغو اتو کسانو یې اووه نیولي او یو یې د مقابلې پر مهال وژلی چې د کابل ۱۶مې امنیتي حوزې اړوند سیمه کې له یوه کور څخه پر غلا کولو بوخت وو.

د استخباراتو لوی رياست په خپل ټويټر کې ليکلي چې امنيتي ځواکونو د کابل د شپاړلسمې امنیتي حوزې اړوند په الوخېلو سیمه کې د غلو پر یوه «خطرناک بانډ» - چې له یوه کور څخه پر غلا کولو بوخت وو- عملیات ترسره کړي دي.

سرچينه د عملیاتو د وخت په اړه د معلوماتو له ورکولو پرته لیکي چې د دغو عملياتو په پایله کې د یادې ډلې اووه کسه نیول شوي او یو کس یې چې د مقابلې هڅه یې کړې وه، ځای پر ځای وژل شوی دی.

د استخباراتو ریاست په دې تړاو يوه ويډيو هم خپره کړې ده.

له نیول شوو کسانو یو یې په دې وېډیو کې وایي: «موږ په الوخېلو کې يوه کور ته د غلا لپاره ورغلو، شپږ کسان کور ته دننه شوو او موږ درې تنه په يو موټر کې ورته کېناستو؛ مجاهدين راغلل او متقابلې ډزې وشوې، زموږ يو کس ووژل شو او يو بل ټپي شو.»

د استخباراتو رياست وايي، د کابل د استخباراتو ریاست منسوبینو د اوولسمې حوزې اړوند سيمو کې يو شمېر وسلې او یوه اندازه مهمات چې په ناقانونه توګه ساتل کېدل، کشف او ترلاسه کړي دي.