جلالاباد (پژواک، ٣١ غويی ۱۴۰۲): په ننګرهار کې د افغاني سرې مياشتې ټولنې له خوا د سوالګرو ټولولو لړۍ پیل شوه او دغه لړۍ به د ټولو سوالګرو تر ټولولو دوام ولري.
مسوولين وايي، د سوالګرو ټولولو کمپاین نن پيل شو او تر هغه به دوام وکړي چې ښار کې ټول سوالګر راټول شوي نه وي.
عام خلک هم د سوالګرو ټولولو لړۍ د پیل هرکلی کوي، خو له مسوولينو غواړي چې حرفوي سوالګر له اړمنو سوالګرو بېل کړي.
په ختیځ کې د افغاني سرې میاشتې استازی احسانالله مملهوال وايي، دغه کمپاین یې نن په جلالاباد ښار کې پیل کړ چې لومړۍ ورځ یې له بېلابېلو سیمو لسګونه سوالګر راټول کړي چې په کې ماشومان او مېرمنې هم شامل دي.
نوموړی زياتوي، له تثبیت وروسته کمعمره ماشومان د کار او ټولنیزو چارو ریاست اړوند حرفوي او نورو زدهکړهیيزو مرکزونو ته معرفي کېږي او د لوړ عمر لرونکو مستحقو سوالګرو ته له ثبت او بایومتریک وروسته میاشتنی معاش ورکول کېږي.
مملهوال زیاته کړه: «د امیرالمومین د حکم پر اساس په کابل، مزار، کندوز، نورستان، کونړ، لغمان او نورو ولایتونو کې د سوالګرو د ثبت او راجستر لړۍ پیل شوې او ځینو کې ختمه شوې؛ خو په ننګرهار کې دا پروسه نن پیل شوه چې له مختلفو ناحیو دا سوالګر راټولوو او بیا یې له سروې وروسته مستحق او نامستحق سره بېلوو او بیا له مستحقو سره د سرې میاشتې له لوري هره میاشت مرسته کېږي.»
مملهوال زیاتوي، هغه ماشومان چې د خپلې کورنۍ نفقه ور له غاړې ده، د زدهکړو زمینې برابرولو ترڅنګ یې له کورنۍ سره هم هم کېږي.
د سرې میاشتې مسوولین د سوالګرو زیاتېدل د اندېښنې وړ ستونزه بولي او وایي، له همدې لارې هڅه کوي چې مستحق او حرفوي سوالګر سره بېل کړي.
بلخوا د جلالاباد ښاریان هم په دې وروستیو کې د سوالګرو زیاتېدو اندېښمن کړي دي.
د خلکو په خبره، په دې سوالګرو کې ډېری یې ځوانې نجونې او د پاخه عمر مېرمنې دي چې دوی یې د مستحق او نامستحق سوالګرو ترمنځ په اسانۍ توپیر نه شي کولای.
د جلالاباد ښار يوه اوسېدونکي ممتازخان د سوالګرو ټولولو له پیل شوې لړۍ خوښي څرګنده کړه، ويې ويل، د نورو ولایتونو په څېر دې په ننګرهار کې هم د مستحقو سوالګرو شمېر معلوم او مرسته دې ورسره وشي.
د فهیم په نوم یو سوالګر چې پر یوه پښه معلول دی وایي، له تېر یونیم کال راهیسې یې سوال ته مخه کړې چې لامل یې فقر، بېوزلي او وزګارتيا ده.
نوموړي له اړوند ادارو د سرپناه او نورو برخو کې د مرستې غوښتنه وکړه.
د يادونې ده، له دې مخکې د پلازمېنې کابل په ګډون د هېواد په يو شمېر نورو ولايتونو کې هم د سوالګرو ټولولو کمپاينونه ترسره شوي خو اوس هم د کابل ښار په بېلابېلو سيمو کې سوالګر ليدل کېږي.
غړيYou need to subscribe to view the full article. Please login or register a new account.
