میدانښار (پژواک، ۴ غبرګولی ۱۴۰۲): د ميدان وردګو امنيتي سرچينې وايي، د دغه ولایت په سیداباد ولسوالۍ کې د یوې زړې مرمۍ چاودنې له امله یو ماشوم وژل شوی او بل ټپي دی.
د یاد ولایت امنيې قوماندانۍ له خوا پژواک خبري اژانس ته په رالېږل شوې خبرپاڼه کې راغلي چې دغه پېښه تېره ورځ د سیداباد ولسوالۍ په شنيز دره کې د یوې زړې مرمۍ چاودنې له امله رامنځته شوې ده.
سرچينه زياتوي، په یاده پېښه کې -چې د ماشومانو د بېاحتیاطۍ له امله رامنځته شوې- یو ماشوم وژل شوی او بل ټپي دی.
شاوخوا یوه مياشت وړاندې هم د میدان وردګو د سیداباد ولسوالۍ په دښت ټوپ سیمه کې د ناچاوده توکو چاودنې له امله څلور ماشومان مړه شوي وو.
login or register a new account.
