<p style="text-align: justify;">کابل (پژواک، ۱۶ غبرګولی ۱۴۰۲): په افغانستان کې له ماشومانو د ملګرو ملتونو د ملاتړ صندوق (یونیسف) وایي، اسلامي امارت باید د سرپل په سانچارک ولسوالۍ کې د زدهکوونکو نجونو د مسمومېدو پېښه وڅېړي.</p>
<p style="text-align: justify;">یونیسف تېره ورځ (دوشنبه) په یو لړ <strong><a href="https://twitter.com/UNICEFAfg/status/1665703068573503489">ټويټونو</a> </strong>کې ویلي، حکومت باید د نجونو او ښځو د امنیت خوندیتوب لپاره کار او د یادې پېښې له عاملینو څېړنه وکړي.</p>
<p style="text-align: justify;">د یاد بنسټ په خبره، ښوونځي باید امن ځایونه واوسي چې ماشومان له ډار پرته پکې درس ووایي او ښځې هم وکولی شي چې له وېرې پرته کار وکړي.</p>
<p style="text-align: justify;">له بلې خوا، د هېواد پخواني ولسمشر حامد کرزي هم په سرپل کې د ماشومانو د مسمومېدو پېښه غندلې او له سرپرست حکومته یې غوښتي چې څومره ژر کېږي د نجونو پر مخ دې د منځنیو ښوونځيو او لېسو دروازې پرانېزي.</p>
<p style="text-align: justify;">هغه په خپله <strong><a href="https://twitter.com/KarzaiH/status/1665710834100600837">ټويټر</a>پاڼه</strong> کې لیکلي: «رسنیو د سرپل په سانچارک ولسوالۍ کې د زدهکوونکو نجونو د مسمومېدو خبر ورکړی. د دغه غیرانساني عمل د غندنې ترڅنګ، د دې پېښې په اړه خپله ژوره اندېښنه او تاثر څرګندوم.»</p>
<p style="text-align: justify;">کرزي زیاته کړې: «هیلهمن یم چې سرپرست حکومت د ښوونځیو او تعلیمي مرکزونو امنیت ته جدي پاملرنه وکړي؛ ځکه د یوې ټولنې هوساینه او نېکمرغي د لوستو او تحصیل کړو ځوانانو پیاوړو مټو پورې تړاو لري.»</p>
<p style="text-align: justify;">کرزي همداراز له سرپرست حکومته غوښتي چې هر څه ژر دې د نجونو پر مخ د منځنیو ښوونځیو او لېسو دروازې پرانېزي اد هېواد ټولو بچیانو ته د تعلیم او تحصیل زمینه برابره کړي.</p>
<p style="text-align: justify;">دا په داسې حال کې ده چې د روان کال د غبرګولي په ۱۴مه د سرپل امنیتي سرچینو ویلي و چې د دغه ولایت د سانچارک ولسوالۍ په یوه ښوونځي کې ۶۰ زدهکوونکې مسمومې شوې دي.</p>
<p style="text-align: justify;">د سرپل د امنیې قوماندانۍ ویاند دینمحمد نظري <strong><a href="https://pajhwok.com/fa/2023/06/04/police-headquarters-about-60-female-students-were-poisoned-in-a-school-in-sarpol/">پژواک</a> </strong>ته ویلي و، وړمه شپه یو شمېر ناپېژانده کسان د سانچارک ولسوالۍ په آب کلان کلي کې د نجونو یوه منځني ښوونځي ته ننوتلي، ټولګي یې سمپاشي کړې او د همغې شپې په سبا ۶۰ زدهکوونکې مسمومې شوې دي.</p>
