بلینکن: کولای شو په افغانستان کې د داعش او القاعده پر وړاندې اقدامات وکړو

[restrict paid="true"]

اټلانټا (پژواک، ۱۹ غبرګولی ۱۴۰۲): د امریکا بهرنیو چارو وزیر انټوني بلېنکن وايي، د اړتیا پر مهال به په افغانستان کې د داعش او القاعده د مهمو څېرو د له منځه وړو لپاره نېغ په نېغه اقدام وکړي.

نوموړي دا څرګندونې پرون د سعودي عربستان په پلازمېنه ریاض کې د 'داعش ماتولو لپاره نړۍال ایتلاف' د بهرنیو چارو وزیرانو له غونډې وروسته په خبري کنفرانس کې کړې دي.

هغه یو ځل بیا ټینګار وکړ چې امریکا او متحدین به یې اجازه ورنه کړي افغانستان یو ځل بیا د ترهګرو پر خوندي پټنځای بدل شي.

د امریکا بهرنیو چارو وزیر ویلي، داعش لا هم یو فعال ګواښ دی او امریکا او متحدین یې په نړۍواله کچه له داعش سره د مبارزې لپاره اقدام کوي.

بلېنکین زیاته کړې: «موږ اوسمهال له خپلو شریکانو او ګاونډیانو سره کار کوو چې خپلې وړتیاوې پیاوړې کړو څو د هر ډول تروریستي ګواښ پر وړاندې مبارزه وکړو چې په افغانستان کې دي او یا هم له هغه ځایه موږ ته متوجه وي. په عین حال کې البته طالبان ادعا کوي چې د داعش خراسان ډلې دښمنان دي او پر وړاندې یې مبارزه کوي خو دې ته په پام سره، دا څرګنده ده چې موږ د دې وړتیا لرو چې په افغانستان کې د خپل امنیت ټينګښت او د هر ډول تروریستي عمل پر وړاندې د مبارزې لپاره اړین اقدامات وکړو.»

د راپورونو له مخې، د یاد کنفرانس ګډونوالو  د داعش خراسان ولایت څانګه د افغانستان او نړۍ هېوادونو لپاره یو ګواښ وباله.

دغه ايتلاف چې ۸۶ غړي لري، موخه یې د داعش ډلې د توان راکمولو او ماتولو ته دوامداره ژمنتیا ده.

دا په داسې حال کې ده چې یوه ورځ مخکې د امریکا د سولې انسټېټوټ په افغانستان کې د داعش ډلې د خراسان ولایت څانګې فعالیتونه د لوېدیځ او سوېلي اسیا شریکانو لپاره مخ په زیاتېدونکی، احتمالي او خطرناک ګواښ بللی و.

د سعودي بهرنیو چارو وزیر شهزاده فیصل بن فرحان یادې غونډې ته ویلي، د داعش ګواښ یوازې په ساحلي هېوادونو پورې محدود نه دی، بلکې ټولې نړۍ ته دی.

هغه زیاته کړې: «موږ په افغانستان کې د ترورېزم پر وړاندې د مبارزې پر اقداماتو خبرې وکړې، څو افغانستان د ترهګرو پر پټنځای بدل نه شي.»

د نوموړي په وینا، سعودي عربستان د داعش له مالي تمویل سره د مبارزې لپاره ډیرې هڅې کوي..

خو اسلامي امارت تل په افغانستان کې د داعش د شتون او پراخو فعالیتونو په اړه راپورونه رد کړي دي.

د امارت ویاند ذبیح‌الله مجاهد په دې اړه رسنیو راډیو ته ویلي، داعش ډله په افغانستان کې د دوی د ځواکونو له خوا ځپل شوې او د له منځه تلو په حال کې ده.

نوموړي زیاته کړې: «په داسې یو حالت او امنیت کې چې د افغانستان خلکو په تېرو څلوېښتو کلونو کې نه دی تجربه کړی، ښکاره ده چې دا د افغانستان پر ضد ښکاره تبلیغات دي او موږ شک لرو چې امریکا په خپله غواړي د افغانستان وضعیت ګډوډ وښيي او ذهنیتونه خراب کړي چې دا ډول پروپاګند د هیڅ طرف په ګټه نه دي.»

مجاهد دا څرګندونې په داسې حال کې کړې چې په تېرو څلورو ورځو کې په بدخشان ولایت کې د دوو بریدونو په پایله کې د دغه ولایت د سرپرست والي او نورو چارواکو په ګډون لسګونو کسانو ته مرګ‌ژوبله اوښتې ده او د دغو بریدونو مسوولیت داعش ډلې پر غاړه اخیستی دی.

[/restrict]