کابل (پژواک، ۱۷ زمری ۱۴۰۲): د مهاجرینو او راستنېدونکو چارو وزرات سرپرست په افغانستان کې د ملګرو ملتونو د سرمنشي ځانګړي استازي له مرستیال سره په لیدنه کې وویل، د بشري مرستو ۸۰ سلنه د مرستندویه بنسټونو له خوا حیف او میل کېږي.
د کډوالو چارو وزارت پر خپله ټویټرپاڼه د یوې خبرپاڼې په خپرولو سره ویلي، د یاد وزارت سرپرست خلیلالرحمن حقاني پرون په افغانستان کې د ملګرو ملتونو د سرمنشي د ځانګړي استازي مرستیال او هېواد لپاره د یاد سازمان د بشري مرستو همغږي کوونکي دانیل اندریس سره وکتل.
خبرپاڼه کې د حقاني په حواله راغلي، په دې کتنه کې له هېواد څخه بهر د افغانانو وضعیت او ستونزو او د افغانستان او ملګرو ملتونو اړوندو ادارو ترمنځ د همغږۍ رامنځته کولو په اړه بحث وشو.
سرچینې د کډوالو وزارت د سرپرست په حواله ویلي: «زموږ او ستاسو موخې اړمنو او مستحقینو ته د مرستو رسول دي او هیله لرو چې نړۍوال همکاران خپلې مرستې ډېرې کړي.»
نوموړي له بهره د کډوالو راستنېدو او بېځایه شوو افغانانو ته په اشارې سره وویل چې هغوی ټول بشري مرستو ته اړتیا لري.
نوموړي د مرستندویه موسسو له خوا د بشري مرستو د حیف او میل په اړه ویلي: «ډېری مرستندویه موسسې یوازې شل سلنه مرستې پر خلکو وېشي او اتیا سلنه حیف او میل کوي.»
هغه زیاته کړه: «د مرستو پراختیا او پیاوړتیا لپاره د یو میکانیزم د رامنځته کېدو غوښتونکي یو څو د مرستو په اړه نړۍوالو ادارو او ډونرانو ته ځواب ورکړای شو.»
دغه راز حقاني په دې لیدنه کې ویلي: «په ګاونډویو او اروپایي هېوادونو کې افغانان ډېرو ستونزو سره مخ دي، هیله لرو چې له هغوی سره نړۍوالو قوانینو مطابق چلند وشي.»
خبرپاڼه کې د دانیل په حواله لیکل شوي: «موږ هم له محدودیتونو سره مخ یوو، موږ حل لارې پیدا کولو لپاره جدي هڅې کوو، ستاسو پیغام به نورو ته ورسوو او یادو موضوعاتو په اړه به خبرې وکړو، څو یو بل سره په همغږۍ کار وکړو او په هر حالت کې تاسو سره همکارۍ ته چمتو یوو.»
غړيYou need to subscribe to view the full article. Please login or register a new account.
