<p style="text-align: justify;">کابل (پژواک، ۲۴ زمری ۱۴۰۲): د ټرانسپورت او هوایي چلند وزارت په ۱۴۰۱ کال کې له ۸،۹ میلیارده ډېرو افغانیو د راټولولو خبر ورکړی او وایي، د افغانستان هوايي حریم د نړۍوالو الوتنو لپاره پرانیستی دی.</p>
<p style="text-align: justify;">ملت ته د دولت حساب ورکولو پروګرام په لړ کې، نن (زمري ۲۶) د ټرانسپورت او هوایي چلند وزارت مالي معین حافظ صدیقالله عابد یوه ناسته کې د دغه وزارت د کار یوه کلن راپور ورکړ.</p>
<p style="text-align: justify;">نوموړي وویل چې تېر کال کې یې له ۸،۹ میلیاردو افغانیو ډېر عواید راټول کړي او د اسلامي امارت خزانې ته یې سپارلي دي.</p>
<p style="text-align: justify;">هغه وایي، تېر کال دوی له ۴،۷ میلیارده ډېرو افغانیو هدف ټاکلی و، خو له ټاکل شوې شمېرې یې شاوخوا څلور میلیارده افغانۍ ډېر عواید لاسته راوړي دي.</p>
<p style="text-align: justify;">د سرچینې په خبره، د ټرانسپورتي شرکتونو د ۶۱۱۱ نقیله وسایطو څېړنه، د ۹۰۰ ټرانسپورتي شرکتونو د معلومات ثبتول، د هېواد له بندرونو ۶ سوه ۷۳ زره او ۹۲۸ د بهرنیو موټرو تګ راتګ او له ۴۶ میلیونو ټنه ډېرو توکو انتقال په تېر کال کې د یاد وزارت عمده فعالیتونه دي.</p>
<p style="text-align: justify;">د دغه وزارت په کلني راپور کې راغلي چې په مرکز او ولایتون کې په ۶۱ سیمو کې د مسافروړونکو او باروړونکو موټرو او اداري ودانیو لپاره ځمکې تثبیت او ځانګړې کېدل له هغه فعالیتونو دي چې تېر کال تر سره شوي دي.</p>
<p style="text-align: justify;">دغه راز په نننۍ ناسته کې د یاد وزارت د پالیسۍ، مصؤونیت او د هوایي چلند تفتیش معین حسیبالله سروش وویل چې د افغانستان حریم د نړۍوالو الوتنو لپاره پرانیستی دی او عملاً نړۍوالې ترانزیتي الوتنې تر سره کېږي.</p>
<p style="text-align: justify;">نوموړی وایي چې د هېواد په هوایي ډګرونو کې د معیاري او لازمي خدماتو وړاندې کول، د هوایي ډګر له تخنیکي وسایطو، سیستمونو او دستګاوو ساتنه او څارنه، په تېر کال کې د دغه وزارت له کړنو څخه دي.</p>
<p style="text-align: justify;">د هغه په خبره، د څلورو نړۍوالو او ۲۴ سیمهییزو هوایي ډګرونو فعال ساتل هم هغه چارې دي چې تېر کال کې ترسره شوې دي.</p>
<p style="text-align: justify;">هغه وایي، تېر کال کې په ټوله کې سلګونه داخلي او بهرني الوتنې شوې او د ۵۳۱۰۹۹ داخلي او بهرنيو مسافرو انتقال ترسره شوی چې له دې ډلې ۳۵۴۶۴۷ بهرني مسافر او۱۷۶۴۵۲ داخلي مسافر وو.</p>
<p style="text-align: justify;">هغه وویل چې یادو مسافرو د کابل، کندهار، هرات او مزارشریف له هوایي ډګرونو داخلي او بهرنۍ الوتنې لرلې او په دې موده کې له ۲۶۰۰ ټنه ډېر توکي د هوایي دهلیزونو له لارې انتقال شوي دي.</p>
<p style="text-align: justify;">سرچینې زیاته کړه چې تېر کال کې له ۳۰ زرو ډېرو حاجیان د هېواد له نړۍوالو هوایي ډګرونو د حج فریضې اداء کولو په موخه سعودي عربستان ته لېږدول شوي دي.</p>
<p style="text-align: justify;">هغه وویل، د هېواد په ۳۴ ولایتونو کې د هوایي سټېشنونو فعالول او فعال ساتل، ۲۴ ساعته د هېواد د هوا د وضعیت اټکلونه، له داخلي او بهرني پیلوټانو سره د هوا ورځني راپورونو شریکول هم تېر کال کې د دغه وزارت له فعالیتونو څخه دي.</p>
<p style="text-align: justify;">سروش وایي، داخلي او بهرنيو الوتکو ته له ۱۶۶۲ ډېرو د الوتنو جوازونو ورکول، تېر کال کې د یاد وزارت یوه بله عمده کړنه ده چې په یوه جواز کې تر سلو پروازونو شامل وي.</p>
<p style="text-align: justify;">دغه راز د سرچینې په خبره، د ګاونډيو هېوادونو په همکارۍ ۲۵۵۴۰ عبوري الوتنو ثبت او راجسترېشن او په خوست، قلعهنو، لغمان، تخار او ګردېز کې د هواپېژندنې د سټېشنونو تجهیز هم په ۱۴۰۱ کال کې تر سره شوي دي.</p>
