<p style="text-align: justify;">جلالاباد (پژواک، ۲۹ زمری ۱۴۰۲): د ننګرهار د اطلاعاتو او کلتور رياست چارواکي وايي، دغه ولايت کې د همېشه بهار په نوم راډيو ټلويزيون ته چې د رسنيزې سرغړونې له امله يې نشرات تړل شوي وو، د خپرونو د بيا پيلېدو اجازه ورکړل شوه.</p>
<p style="text-align: justify;">چارواکي وايي، دا رسنيز مرکز ۱۹ ورځې وړاندې د ځينو نشراتي سرغړونو له کبله د لنډمهال لپاره تړل شوی و.</p>
<p style="text-align: justify;"><img class=" wp-image-557880 alignleft" src="https://pajhwok.com/wp-content/uploads/2023/08/همشه-بهار-300x225.jpg" alt="" width="336" height="252" />د ننګرهار اطلاعاتو او کلتور ریاست د اطلاعاتو آمر او په ننګرهار کې د رسنیو سرغړونو د ارزونې کمېسیون مسوول صدیق الله قریشي بدلون د زمري په ۲۹مه پژواک خبري اژانس ته وويل، دغې رسنۍ ته يو ځل بيا د نشراتو اجازه ورکړل شوه.</p>
<p style="text-align: justify;">هغه زياته کړه: «موږ په نشراتي برخه کې ټولو رسنیو او همکارانو ته یې د قانون سرې کرښې چې د اسلام مبارک دین او افغاني عنعناتو ته په کتو جوړې شوي په ګوته کړي، ترڅو هېڅ یوه رسنۍ او رسنوال ترې سرغړونه ونه کړي.»</p>
<p style="text-align: justify;">بدلون وایي، څه موده وړاندې همېشه بهار دا اصول تر پښو لاندې کړل او د رسنیو د سرغړونو ارزونې کمېسيون یې د اصلاح په خاطر نشرات وځنډول، چې د ستونزو حل په صورت کې نن ورته یو ځل بیا د یاد کمېسیون له لوري د نشراتو د بيا پیلېدو اجازه ورکړل شوه.</p>
<p style="text-align: justify;">نوموړي همدارنګه په ټولو رسنیو غږ وکړ چې خپل نشرات د دولت له پالیسیو سره سم برابر او د نظام اساسات په پام کې ونیسي.</p>
<p style="text-align: justify;">د همېشه بهار راډيو ټلويزيون مسوول اتل خان ستانکزي هم پژواک ته تاييد کړه چې نن مازيګر يې د دفتر مهرولاک لرې شو او بېرته د نشراتو اجازه ورکړل شوه.</p>
<p style="text-align: justify;">په ورته وخت کې په ننګرهار کې د خپلواکو خبريالانو اتحاديې مشر ايمل ظاهر هم دغه خبر تاييد کړ او د ننګرهار د اطلاعاتو او کلتور رياست څخه يې مننه وکړه چې دغه ستونزه يې د دغې اتحاديې، ختيځ کې د خبريالانو خونديتوب کمېټې او ځايي خبريالانو په غوښتنه حل کړه.</p>
<p style="text-align: justify;">د يادولو وړ ده چې اوسمهال په ننګرهار کې د کليد راډيو مسوول مدير او يو خبريال هم د استخباراتو رياست له خوا بهر مېشتو دولت ضد رسنيو سره د همکارۍ په تور نیول شوي دي.</p>
