د امر بالمعروف وزیر: د مسلمانانو مسؤولیت دی چې د اسلامي نظام جوړولو کې مرسته راسره وکړي

کابل (پژواک، ۱۲ وږی ۱۴۰۲): د امر بالمعروف او نهي عن‌المنکر وزارت سرپرست وايي: «اوس د نظام جوړونه را له غاړې ده، دا یوازې زموږ نه، بلکې د ټولو مسلمانانو مسؤولیت دی چې مرسته وکړي؛ ځکه موږ د اسلامي نظام دعوه کړې ده.»

شیخ محمدخالد حنفي دغه څرګندونې نن د اسلامي همکاریو سازمان له استازو او د اسلامي هېوادونو د علماء کرامو له پلاوي سره کابل کې په لیدنه کې کړې دي.

د امر بالمعروف، نهي عن‌المنکر او شکایتونو اورېدو وزارت په خبرپاڼه کې راغلي چې په یاده ناسته کې د اسلامي همکاریو سازمان مرستيال دکتور طارق بخيت او لوړپوړو غړو، د مدني حرم د حدیثو استادانو، د بحرين، اردن، ماليزيا، اندونيزيا، ګينيا او اسلامي نړۍ د نورو هېوادونو مخورو او مشهورو علماء کرامو او د نړۍوالې اسلامي فقهې نړۍوالې اکاډمي غړو ګډون درلود.

د خبرپاڼې له مخې، د یاد وزارت سرپرست په دې ناسته کې ویلي: «د اسلاميت له امله که څه هم هېوادونه مو بېل خو زړونه مو یو دي؛ د وروڼو حیثیت لرو او لکه یو جسد داسې یو، مخکې مو له هېواد او دین څخه د دفاع مسؤولیت و، چې هلته مو د خدایﷻ په نصرت سره بریا ترلاسه کړه، خو اوس د نظام جوړونه را تر غاړې ده چې دا یوازې زموږ نه، بلکې د ټولو مسلمانانو مسؤولیت دی چې مرسته وکړي؛ ځکه موږ د اسلامي نظام دعوه کړې.»

هغه وايي، افغانستان کې د «منکراتو» مخنیوی شوی او له تېرو دوو کلونو راهیسې «سمون» رامنځته شوی دی.

نوموړي له یاد علماوو غوښتي چې په افغانستان کې د سترګو لیدلی حال او واقعي تصویر خپلو هېوادونو او نورو مسلمانانو ته ورسوي.

په خبرپاڼه کې راغلي، راغلو علماوو د افغانستان اوسنی وضعیت یو ښه فرصت وباله او ویې ویل، دا یو افتخار دی چې دلته د امر بالمعروف، نهی عن‌المنکر او شکایتونو اورېدو په نوم وزارت شتون لري؛ ځکه چې امر بالمعروف او نهي عن‌المنکر د دین مهمه برخه ده.