میمنه (پژواک، ۱۰ تله ۱۴۰۲): فاریاب کې ځایي سرچینې وایي چې د دغه ولایت د میمنې ښار یوه خصوصي روغتون ته یو کس ننوتلی، یو نرس یې وژلی او خپله یې هم ځان په مرمۍ ټپي کړی دی.
د فاریاب امنیې قوماندانۍ له جنایي جرمونو سره د مبارزې مدیریت مرستیال داملا محمد معاوض پژواک ته وویل، تېره شپه د نصیراحمد په نوم یوه ۳۰ کلن سړي د دویمې امنیتي حوزې اړوند د شفق پنځه بستریز اورتوپیدي خصوصي روغتون ته ننوتلی، د دغه روغتون یو نرس محمدزمان یې د تومانچې په ډز وژلی او بیا یې خپل ځان هم ټپي کړی دی.
معاوض وویل: «قاتل د دې ودانې د مالک زوی دی خو تر اوسه د قتل انګېزه نه ده معلومه، خو هغه ټپي دی او د میمنې په روغتون کې تر درملنې لاندې دی.»
د شفق روغتون یوه کارکوونکي پژواک ته وویل چې محمدزمان له خپلو ملګرو سره د نوکریوالۍ په خونه کې و چې نصیراحمد نومی کس راغی او هغه یې وواژه.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن