متقي له چیني پانګوالو غوښتي چې افغانستان کې د برېښنا تولید برخه کې پانګونه وکړي

کابل (پژواک، ۱۲ تله ۱۴۰۲): د بهرنیو چارو وزارت سرپرست د چین له «سیچوان د انرژي او پانګونې پراختیا» له شرکته د لیدنې پر مهال د یاد هېواد له پانګوالو وغوښتل چې افغانستان کې د برېښنا د تولید په برخه کې پانګونه وکړي.

دا مطلب د بهرنیو چارو وزارت د ویاند مرستیال حافظ ضیااحمد تکل نن (چهارشنبه) پر خپله اېکس‌پاڼه خپور کړی دی.

سرچینې لیکلي، مولوي امیرخان متقي چین ته د سفر په ترڅ کې د برېښنا انرژي برابروونکو یو له لویو شرکتونو چې د چین د سیچوان ایالت په چنګدو ښار کې موقعیت لري، لیدنه کړې او د افغانستان او چین تر منځ د برېښنا انرژۍ د همکاریو پراختیا په اړه یې خبرې اترې کړې دي.

تکل د متقي له قوله لیکلي چې متقي د چین پانګوال وهڅول څو افغانستان کې د برېښنا د انرژۍ د تولید په برخه کې پانګونه وکړي.

متقي ویلي، افغانستان د لمریز، بادي، اوبو او ډبرو سکرو د برېښنا د تولید لوی ظرفیت لري.