<p style="text-align: justify;">کابل (پژواک، ۱۲ تله ۱۴۰۲): هالند کې د افغانستان سفارت وايي، دوی د هېوادوالو د ستونزو حل او د قونسلي خدمتونو په وړاندې کولو کې د سرپرست حکومت د بهرنیو چارو له وزارت سره په تعامل کې دي.</p>
<p style="text-align: justify;">د بهرنیو چارو وزارت مرستیال ویاند حافظ ضیااحمد تکل نن پر خپله اېکسپاڼه لیکلي، هالنډ کې د افغانستان سفارت هېوادوالو ته ډاډ ورکوي چې دوی د خپل هېواد استازیتوب کوي.</p>
<p style="text-align: justify;">سرچینې زیاته کړې، یاد هېواد کې افغان سفارت د هېوادوالو د ستونزو په حل او د قونسلي خدماتو په وړاندې کولو کې د افغانستان د بهرنیو چارو وزارت سره په تعامل کې دی او د قونسلي اسنادو د تایید مکتوبونه په نورمال ډول کابل کې دغه وزارت ته لېږي.</p>
<p style="text-align: justify;">د سرچینې په خبره، هغه مراجعین چې بې له وخت اخیستلو مراجعه کوي کولای شي د قونسلي خدمتونو ترلاسه کولو په موخه له دوشنبې څخه تر چهارشنبې د سهار له ۹ بیا د ماسپښین تر ۳ بجو پورې، دغه سفارت ته مراجعه وکړي.</p>
<p style="text-align: justify;">د سرچینې د معلوماتو له مخې، د پنجشنبې ورځ هغو مراجعینو ته ځانګړې شوې چې د لیدنې وخت یې اخیستی وي.</p>
