هرات (پژواک، ۲۵ تله ۱۴۰۲): د هرات وروستۍ مرګونې زلزلې د دې ترڅنګ چې زرګونو کسانو ته یې مرګژوبله واړوله، د بازارونو، پوهنتونونو او ښوونځيو تړل کېدو لامل هم شوې دي.
که څه هم په هرات کې له لومړۍ مرګونې زلزلې ۱۲ ورځې تېریږي، اوس هم په دغه ولایت کې ټول خلک له کورونو بهر په وېره کې شپې ورځې تېروي، دا په دې سړه هوا او امکاناتو نشتوالي کې د خلکو په ځانګړې توګه ماشومانو لپاره سخته تمامېږي او د دې لړۍ دوام د ښوونځيو تړل کېدو لامل هم شوی دی.
د هرات د والي ویاند مولوي نثاراحمد الیاس نن سهشنبې پژواک ته وویل چې د پوهنې وزارت په سپارښتنه د دولتي او خصوصي ښوونځيو رخصتي به تر راتلونکې دوشنبې وغځېږي.
د الیاس په خبره، په ځينو سیمو کې د ښوونځيو ودانۍ چندان مقاومت نه لري، نو لازمه ده چې د زلزلې له احتمالي خطره خوندیتوب په موخه د ښوونځیو رخصتي تر راتلونکې دوشنبې (د لېندۍ تر لومړۍ) وغځېږي.
د سلطان غیاثالدین لېسې د اووم ټولګي یوه زدهکوونکي محمدطاهر چې له خپلې کورنۍ سره د زلزلې له وېرې د انجیل ولسوالۍ یوه باغ ته تللی، پژواک ته وویل، دغه حالت او خپلو درسونو ته اندېښمن دی، له ۱۲ ورځو راهیسې ښوونځي ته نه دی تللی.
په هرات کې دولتي ښوونځي له هماغې لومړۍ زلزلې وروسته تر اوسه تړلي دي.
د یادونې ده، په هرات کې د څو پرلهپسې زلزلو له امله د ښځو او ماشومانو په ګډون له دوه زره ډېر کسان مړه او همدومره نور ټپیان شول او په عین وخت کې د دغه ولایت د مرکز ترڅنګ په زندهجان، ګلران، غوریان، انجیل او کهسان ولسوالیو کې سلګونه کورونه په بشپړ ډول ویجاړ شوي دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن