<p style="text-align: justify;">بامیان (پژواک، ۲۳ لړم ۱۴۰۲): بامیانو کې ځايي مسوولین وايي، یوه ځوانه ښځه چې د دغه ولایت په پنجاب ولسوالۍ کې د خپل پلار له خوا بندي وه، ازاده شوه.</p>
<p style="text-align: justify;">د بامیانو د امنیې قوماندانۍ ویاند محمدخواني رسا پژواک خبري اژانس ته وویل، یوه ۲۸ کلنه ښځه چې له دوو کلونو راهیسې د خپل پلار له خوا په کور کې بندي وه، د دوشنبې پر مازدیګر (د لړم ۲۲مه) د امنتيي ځواکونو له خوا ازاده شوه.</p>
<p style="text-align: justify;">نوموړي زیاته کړه، دغه مېرمن طاهره نومیږی چې د پلار له خوا یې د پنجاب ولسوالۍ په «زرد سنګ» کلي کې په یوه اتاق کې بندي شوې وه.</p>
<p style="text-align: justify;">هغه څرګنده کړه: «دغه زنداني شوې ښځه له خپل مېړه د طلاق اخیستلو وروسته د خپل پلار کور ته تللې وه او له خپلې میرې سره یې ژوند کاوه.»</p>
<p style="text-align: justify;">د هغه په خبره، لومړنۍ پلټنې ښيي چې طاهره له کورنیو ستونزو او له خپلې میرې سره له شخړې وروسته د خپل پلار له لوري زنداني شوې وه او دوه کاله یې په کورني زندان کې تېر کړل.</p>
<p style="text-align: justify;">رسا زیاته کړه چې له کشفي راپورونو وروسته د دغه ولایت امینتي ځواکونو ومونده چې طاهره په یوه تیاره اتاق کې په ډېر خراب وضعیت کې بندي ده.</p>
<p style="text-align: justify;">د بامیانو د امینې قوماندانۍ ویاند وویل، دا ښځه چې اوسمهال له ښه روغتیايي وضعیته برخمنه نه ده، د درملنې په موخه د دې ولسوالۍ روغتون ته وړل شوي ده.</p>
<p style="text-align: justify;">هغه یادونه وکړه چې د یادې مېرمنې پلار د دغه قضیې په تړاو نیول شوی او د نورو تحقیقاتو لپاره د پنجاب ولسوالۍ د جنایې جرمونو سره د مبارزې د امریت تر نظارت لاندې دی.</p>
