د ازبکستان ولسمشر: افغانستان د سیمې په ثبات کې اساسي رول لري

کابل (پژواک، ۴ لېندۍ ۱۴۰۲): د ازبکستان ولسمشر د سیمې په ثبات کې د افغانستان پر اساسي رول ټينګار کړی، ویلي یې دي چې د افغانستان سرپرست حکومت له ګډون پرته په نړۍوالو خبرو کې مثبتې نتیجې ته نشي رسېدلی.

د مرکزي اسیا هېوادونو د اقتصاد لپاره د ملګرو ملتونو ځانګړی پروګرام پرون د اذربایجان پلازمېنې باکو کې د افغانستان له حضور پرته ترسره شو.

د ازبکستان ولسمشرۍ ماڼۍ یوې خبرپاڼې کې لیکلي چې د دغه هېواد ولسمشر میرضیایف په دې ناسته کې ویلي چې نه شي کولای افغانستان له اوسنیو ستونزو سره یوازې پرېږدي.

هغه وویل چې د افغانستان د سرپرست حکومت له ګډون پرته نه شي کېدای چې په نړۍوالو خبرو کې کومې مثبتې نتیجې ته ورسېږي.

دا څرګندونې په داسې حال کې مطرح شوې چې د افغانستان د تېر حکومت ځينو چارواکو او سیاسیونو دوه ورځې مخکې په مسکو کې د افغانستان د سرپرست حکومت له حضور پرته یوه ناسته ترسره کړې وه.