سرپل (پژواک، ۱۳ لېندۍ ۱۴۰۲): سرپل کې ځايي مسوولین وايي چې د دغه ولایت د کوهستانات ولسوالۍ سړک د ۶،۵ کیلومتره برخې د جغلاچونې او هوارکارۍ چارې د اووهنیم میلیون افغانیو په لګښت بشپړې او ګټې اخیستنې ته وسپارل شوې.
د سرپل د ټولګټو رییس مولوي اسدالله مسرور پژواک خبري اژانس ته وویل، د کوهستانات ولسوالۍ لویي لارې ۶.۵ کیلومتره برخه چې په درېیو میاشتو کې جغلکارِي او هواره شوې، نن ګټې اخیستنې ته وسپارل شوه.
هغه زیاته کړه، دغه سړک اووه متره پنلوالی لري چې په اږدو کې یې پنځه پلچک هم جوړ شوي او کار یې د ټولګټو وزارت له بودجې د اووهنیم میلیون افغانیو په لګښت د یوه خصوصي شرکت له لوري مخته وړل شوی.
د ټولګټو رییس وویل: «تېر کال مو هم د کوهستانات ولسوالۍ ۴۵ کیلومتره لویه لار تر سرپل ښاره جغلکاري کړې وه، یوازې پر ۳.۵ کیلومتره سړک جغل نه دی اچول شوی چې ټولګټو ریاست پلان لري چې راتلونکی کال د خپلې ماشینرۍ په وسیله هغه هم ترمیم او جغلکاري کړي.»
نوموړی وايي چې د کوهستانات ولسوالۍ لویې لارې په جوړېدو خلکو ته ډېرې اسانتیاوې برابرې شوې دي.
د کوهستانات ولسوالۍ یوه اوسېدونکي محمدعلي وویل چې مخکې سړک خام او ډېر خراب و، اوس چې جغل پرې اچول شوی، موټر په اسانۍ مرکز سرپل ته تګ راتګ کوي.
د کوهستانات د پسني کلي اوسېدونکي عبدالولي وویل: «مخکې چې زموږ سړک خراب و، ډېر موټر چپه کېدل، ناروغان او کرنیز محصولات پر وخت سرپل ښار ته نه رسېدل، خو اوس له نېکه مرغه دغه ستونزه حل شوې ده.»
GET IN TOUCH
NEWSLETTER
SUGGEST A STORY
PAJHWOK MOBILE APP