وچکالیو فراه کې کرنه اغېزمنه کړې ده

فراه (پژواک، ۲۲ لېندۍ ۱۴۰۲): د فراه د کرنې، اوبولګولو او مالدارۍ ریاست وایي چې په دغه ولایت کې تېر کال  له ۷۵ تر ۸۰ زره هکتاره ځمکه کرل شوې وه خو سږ کال دغه کچه د وچکالۍ له امله ۶۰ زره هکتارو ته راټیټه شوې ده.

د فراه د کرنې ریاست د ترویج عمومي مدیر انجینر عبدالخالق شېرزاد پژواک خبري اژانس ته وویل چې د روان کال وچکالي پر کښتونو ډېر بد اغېز کړی او د اوبو کچه ډېر ټيټه شوې ده.

هغه وایي: «سږ کال ۶۰ زره هکتاره ځمکه غنم کرل شوي خو تېر کال ۷۵ تر ۸۰ زره هکتاره ځمکه غنم کرل شوي وو؛ که چېرې د فراه‌ رود اوبه درلودلای نو د کښت کچه لا ډېرېده، خو اوس یوازې هغه کسان کښت کوي چې د سولر اخيستلو وس ولري.»

شېرزاد زیاتوي چې دغه ریاست دا ستونزه د کرنې، اوبولګولو او مالدارۍ له وزارت او همکارو موسسو سره شریکه کړې ده.

هغه وایي چې دغه ریاست دغه راز په دغه ولایت کې خلکو ته عامه پوهاوی ورکړی څو په ټولو ولسوالیو کې چک‌ډیمونه جوړ کړي او هغه کښتونه وکړي چې لږو اوبو ته اړتیا لري.

د بالابلوک ولسوالی د ګنج‌اباد کلي یو کروندګر حفیظ الله وایي: «په بالابلوک کې ډېر کم کلي یوازې د څاگانو اوبه لري خو  یو شمېر نور کلي شته چې ان دومره اوبه نه لري چې د سولر په مټ یې پورته کړي؛ ځکه چې رود هم اوبه نه لري نو د همدې له امله په دې ولسوالۍ کې د بزګرانو کښتونه کم شوي دي.»

د دغه ولایت د پشترود ولسوالۍ یو بل کروند محی‌الدین هم وایي چې سږ کال په دې ولسوالۍ کې کروندګرو لږ کښتونه کړي دي.

هغه وایي، تر هغه چې په دغه ولایت کې د بخش‌اباد بند جوړولو چارې بشپړې نه شي، د کرنې لپاره د اوبو ستونزه نه شي حل کېدای.

هغه وایي: «په ټول ولایت کې کم کښت شوی؛ خلک د دې وس نه لري چې سولران واخلي، هره ورځ اوبه کښته ځي، پخوا به په لس تختو سولرانو اوبه پورته کېدې اما اوس په شل تختو سولرانو هم اوبه نه پورته کېږي.»

د یادونې ده، پژواک خبري اژانس د روان کال په چنګاش میاشت کې یو راپور خپور چې د تودوخې درجې لوړېدل، پرله‌پسې وچکالي، په منځنۍ کچه د ځمکې لاندې اوبو ۱۱ متره ټیټېدل، غیرموسمي بارانونه او د سېلابونونو راوتل په افغانستان کې د خلکو بېځایه کېدو، مالدارۍ کمېدو او د زرګونه هکټاره کرنیزې ځمکې د له‌ منځه تلو لامل ګرځېدلي دي.