<p style="text-align: justify;">میمنه (پژواک، ۲۴ لېندۍ ۱۴۰۲): د فاریاب په پښتونکوټ ولسوالۍ کې د یوه لومړني ښوونځي ودانۍ چې د ناروې هېواد د ۱۸،۶ میلیون افغانیو په مرسته جوړه شوې، ګټې اخیستنې ته وسپارل شوه.</p>
<p style="text-align: justify;">د فاریاب د پوهنې رییس مولوي حفیظ الله معتصمبالله پژواک خبري اژانس ته وویل، د یادې ودانۍ جوړېدو چارې د ۱۴۰۱ کال د لېندۍ په لومړۍ نېټه د ناورې هېواد په مرسته د «دارت» موسسې له لوري د پښتونکوټ په «مېشمست» کلي کې پیل شوې چې د یوه کال په موده کې پای ته ورسېدې.</p>
<p style="text-align: justify;">د هغه د معلوماتو له مخې، یاد لومړنی ښوونځي پر ۲۰۰۰ متر مربع ځمکه کې جوړ شوی چې اته درسي ټولګي، اداري شعبه، د ساتونکي خونه، احاطوي دېوال، د برېښنا سولري سیسټم، د اوبو څاه، ۱۵۲ میز او چوکۍ، اداري فرنېچر او د لوبو میدان لري.</p>
<p style="text-align: justify;">هغه زیاته کړه، د مېشمست کلي ښوونځي د ودانۍ په جوړېدو سره د څه باندې ۴۰۰ زدهکوونکو د ځای ستونزه چې مخکې یې تر خېمو لاندې درس لوست، حل کېږي.</p>
<p style="text-align: justify;">د مېشمست سیمې یوه اوسېدونکي عبدالخلیل د خوښۍ په څرګندولو پژواک ته وویل، د دوی په سیمه کې د داسې عصري ښوونځي جوړېدل یو خوب و چې نن رښتیا شو.</p>
<p style="text-align: justify;">هغه وویل، د تېر حکومت په شلو کلونو کې د سیمې اوسېدونکو په وار وار هڅه وکړه څو د ښوونځي ودانۍ جوړه شي او ماشومان یې په ارامۍ زدهکړې وکړي خو پاملرنه ورته ونه شوه.</p>
<p style="text-align: justify;"></p>
