<p style="text-align: right;">کابل (پژواک، ۸ مرغومی ۱۴۰۲): پخواني ولسمشر غني هېواد کې د ښځو ژوند ته پر «جدي پاملرنې» ټینګار کوي او وايي، د ننګونو راکابو کېدو لپاره دې لومړیتوبونه مشخص او له ایران او پاکستان سره چې د خبرو بنسټ اېښودلی شوی، هغو مذاکرتو ته دې دوام ورکړل شي.</p>
<p style="text-align: justify;">هغه دغه څرګندونې د «ژوند لارې» تر سرليک لاندې د غږیزو پاډکاسټونو درېیم <strong><a href="https://twitter.com/afbnpashto/status/1740434153148153973">پروګرام</a> </strong>کې چې اېبيان شبکې له لارې خپرېږي، کړې دي.</p>
<p style="text-align: justify;"><strong>افغانستان کې د ښځو ژوند</strong></p>
<p style="text-align: justify;">د افغانستان پخواني ولسمشر محمداشرف غني یاد پروګرام کې هېواد کې د ښځو روان حالت ته په اشارې ویلي چې ښځې د یوې ټولنې بنسټیز رکن دی او اړینه ده چې افغانستان کې دغه قشر ته جدي پاملرنه وشي.</p>
<p style="text-align: justify;">هغه وايي: «څومره کونډې مېرمنې دي چې ټول بار د کورنۍ پر دوی باندې دی او که دوی کار ونه کړي تاسې پوهېږئ د دوی لوڼې به پر څنګه سرنوشت باندې اخته شي؟ یا د دوی واړه زامن به پر څنګه سرنوشت باندې اخته شي؟»</p>
<p style="text-align: justify;">هغه سرپرست حکومت ته په اشارې وویل: «که څوک منع کوئ نو دومره مېرانه ولرئ،چې د ژوند شرایط ورته برابر کړئ، خدای چا ته دا حق ورکړی چې یو څوک په تدریجي مرګ ووژني؟»</p>
<p style="text-align: justify;">له شاوخوا دوو کلونو راهیسې هېواد کې د اسلامي امارت له بیا واکمنېدو را وروسته د ښځو پر کار او زدهکړو محدودیتونه لګېدلي او چارواکي په دې اړه د شرایطو پر برابرولو ټینګار لري.</p>
<p style="text-align: justify;">خو د یادونې ده چې په ځينو حکومتي ادارو او د خصوصي سکتور په ځینو برخو کې ښځو ته د کار اجازه ورکړل شوې او دغه راز اسلامي امارت د هغو ښځو تنخواګانې هم ورکوي چې د حکومت کارکوونکې دي، خو تر اوسه دندو ته نه دي غوښتل شوي.</p>
<p style="text-align: justify;"><strong>د افغانستان ننګونې</strong></p>
<p style="text-align: justify;">دغه راز، محمداشرف غني سیمه کې له افغانانو سره د ناوړه چلند بله سرچینه په هغه ابهام کې نغښتې بولي چې د افغانستان د راتلونکې په اړه له هېوادونو سره پیدا شوی او نه پوهېږي چې افغانستان کوم لورې ته ځي.</p>
<p style="text-align: justify;">غني وویل: «د دې لپاره چې دا ننګونې راکابو او اټکلېدونکې شي، داسې یوې پېیلې او کوټلې تګلارې ته اړتیا ده چې د ارقامو او اسنادو پر بنسټ لومړیتوبونه مشخص کړي او د عمومي خطر مخه ونیسي.»</p>
<p style="text-align: justify;">هغه په ایران او پاکستان کې د افغان کډوالو وروستني وضعیت ته په کتنې وویل چې د خپلې واکمنۍ پر مهال یې له پاکستان او ایران سره د اوږدمهاله دوه اړخیزو همکاریو او په ځانګړي ډول د کډوالو په اړه خبرې کړې دي.</p>
<p style="text-align: justify;">نوموړی زیاتوي چې له ایران او پاکستان سره د خبرو بنسټ اېښودل شوی او باید هماغه مذاکراتو ته دوام ورکړل شي؛ څو د افغانستان راتلونکی له ګواښ سره مخ نه شي.</p>
