د ترکیې سفیر: خپله خاوره کې د افغانستان د حکومت خلاف چا ته د فعالیت اجازه نه ورکوو

<p style="text-align: justify;">کابل (پژواک، ۲۹ مرغومې ۱۴۰۲): کابل کې د ترکیې سفیر د ریاست‌الوزرا له سیاسي مرستیال سره په لیدنه کې ویلي، هېواد یې چا ته اجازه نه ورکوي چې د اسلامي امارت خلاف په ترکیه کې سیاسي او پوځي فعالیت وکړي.</p>

<p style="text-align: justify;">ارګ پر خپله اېکس‌پاڼه لیکلي چې د ریاست‌الوزراء سیاسي مرستیال مولوي عبدالکبیر نن په کابل کې د ترکیې له سفیر جنک اونال سره وکتل.</p>

<p style="text-align: justify;">سرچينې لیکلي چې د ترکیې سفیر د افغانستان او ترکیې د اړیکو پر پراختیا ټینګار وکړ، ویې ويل، ترکي سوداګر چمتو دي چې د کانونو، برېښنا او کرنې برخو کې په افغانستان کې پانګونه وکړي.</p>

<p style="text-align: justify;">هغه دغه راز ویلي، ترکیه له افغانستان سره د پوهنې او لوړو زده‌کړو برخو کې همکارۍ ته چمتو ده او د افغانستان د پرمختګ ملاتړ کوي.</p>

<p style="text-align: justify;">د هغه په خبره، هېواد یې هیچا ته اجازه نه ورکوي چې د اسلامي امارت خلاف په ترکیه کې سیاسي او پوځي تحرکات وکړي.</p>

<p style="text-align: justify;">د ریاست‌الوزرا سیاسي مرستیال هم په دې لیدنه کې ویلي، د اسلامي امارت له حاکميت راوروسته په افغانستان کې ترکي پانګه‌والو ته د پانګونې ښه زمینه برابره شوې ده.</p>

<p style="text-align: justify;">د هغه په خبره، اسلامي امارت له ټولو هېوادونو سره ښې اړیکې غواړي او هڅه کوي په سیمه کې اقتصادي او ترانزیټي اړیکې پراخې کړي.</p>

<p style="text-align: justify;">ارګ لیکلي چې مولوي عبدالکبیر له ترکیې د دغه دريځ له امله چې ګواکې چا ته د اسلامي امارت خلاف د پوځي او سیاسي فعالیت اجازه نه ورکوي، مننه وکړه او زياته يې کړه، اوس په هېواد کې ټولو افغانانو ته د ګډ او ارام ژوند زمینه برابره شوې ده.</p>

<p style="text-align: justify;">د یادونې ده، په افغانستان کې د وړم کال له سیاسي بدلون وروسته ګڼ شمېر پخواني چارواکي ترکیې ته ولاړل او اوس هلته ژوند کوي.</p>