<p style="text-align: justify;">[restrict paid="true"]</p>
<p style="text-align: justify;">اټلانټا (پژواک، ۱۸ سلواغه ۱۴۰۲): د پښتون ژغورنې غورځنګ مشر منظور پښتین تر شاوخوا دوه میاشتو وروسته د پاکستان د پنجاب له یوه زندان څخه خوشې شوی دی.</p>
<p style="text-align: justify;">هغه شاوخوا ۶۶ ورځې مخکې په بلوچستان ایالت کې ونیول شو، بیا په اسلاماباد کې د پنجاب پولیسو ته وسپارل شو او له هغه وروسته د پنجاب په یوه زندان کې ساتل کېده.</p>
<p style="text-align: justify;">د پښتون ژغورنې غورځنګ بلوچستان کې هغه مهال نیول شوی و چې پر ډيورنډ کرښه د اوښتو راوښتو لپاره د ویزې او پاسپورټ درلودو شرط لازمي کولو پر ضد د روان احتجاج ته له وینا وروسته «تربت» سیمه کې د بلوڅانو په یوه بل پرلت کې ګډون ته روان و.</p>
<p style="text-align: justify;">هغه د یوې محکمې په حکم د چهارشنبې په ورځ له زندانه خوشې شوی دی.</p>
<p style="text-align: justify;">په ټولنیزو شبکو کې د هغه د خوشې کېدو او بیا خپلو پلویانو د خبرو کولو عکسونه او ویډیوګانې خپرې شوې دي.</p>
<p style="text-align: justify;">پښتین له زندانه له وتلو وروسته خپلو پلويانو ته ویلي: «خلک چې زندان تېر کړي، نرم شي، کيسې ته تيارېږي، خو موږ ورته لاسخت شو.»</p>
<p style="text-align: justify;">هغه د زندان په اړه ویلي: «ما په ژوند کې دومره اطمينان او دومره سکون چېرته نه دی ليدلی، په جېل کې به چې په ما څومره سختي زياتېدله نو زما زړه ته به يوه خبره راغله، دومره سکون به راغی چې ته د هغو مظلومو خلکو چې چا يې غږ نه پورته کاوه، وروڼه او زامن يې ورک وو، د هغو خلکو چې له جبر لاندې يې ژوند کاوه، د هغوی لپاره په خواري کولو کې، په تا تکليف راغلی دی.»</p>
<p style="text-align: justify;">منظور پښتین له دې مخکې هم دوه ځله د پاکستان له خوا زنداني شوی و.</p>
<p style="text-align: justify;">[/restrict]</p>
